नवी दिल्ली: भारतातील सर्वात मोठी आयटी कंपनी टाटा कन्सल्टन्सी सर्व्हिसेस (टीसीएस) ने आरती सुब्रमण्यम यांची नवीन कार्यकारी संचालक-अध्यक्ष आणि मुख्य परिचालन अधिकारी (सीओओ) म्हणून नियुक्ती केली आहे. ही नियुक्ती १ मे २०२५ पासून प्रभावी होईल. आरती सुब्रमण्यम टीसीएसच्या पहिल्या महिला सीओओ ठरल्या असून, पुरुषप्रधान आयटी क्षेत्रात त्यांनी स्वतःचा ठसा उमटवला आहे.

कोण आहेत आरती सुब्रमण्यम?
सध्या टाटा समूहातील टाटा सन्स येथे ग्रुप चीफ डिजिटल ऑफिसर म्हणून कार्यरत असलेल्या आरती यांनी टाटा समूहात तीन दशकांहून अधिक काळ सेवा केली आहे. त्यांनी १९८९ मध्ये टीसीएसमध्ये ग्रॅज्युएट ट्रेनी म्हणून करिअरला सुरुवात केली. त्यानंतर त्या विश्लेषक, प्रकल्प व्यवस्थापक, खाते व्यवस्थापन आणि वरिष्ठ कार्यकारी अशा विविध भूमिकांमध्ये कार्यरत होत्या. टाटा सन्समध्ये त्यांनी डिजिटल तंत्रज्ञानाच्या माध्यमातून टाटा समूहातील कंपन्यांची कार्यक्षमता, ग्राहक सहभाग आणि स्पर्धात्मक लाभ वाढवण्यात महत्त्वाची भूमिका बजावली.

शैक्षणिक पार्श्वभूमी
आरती यांनी वारंगल येथील राष्ट्रीय प्रौद्योगिकी संस्थानमधून संगणक विज्ञानात बी.टेक. आणि अमेरिकेतील कॅन्सस विद्यापीठातून अभियांत्रिकी व्यवस्थापनात एम.एस. पदवी प्राप्त केली आहे.

टीसीएसमधील योगदान
टीसीएसमध्ये त्यांनी रिटेल आणि सीपीजी व्यवसाय युनिटसाठी डिलिव्हरी हेड, तसेच डिलिव्हरी एक्सलन्स, गव्हर्नन्स आणि कम्प्लायन्सच्या वैश्विक प्रमुख आणि कार्यकारी संचालक म्हणून काम केले. याशिवाय, त्या टाटा कॅपिटल, टाटा एआयए लाइफ इन्शुरन्स, क्रोमा रिटेल, टाटा डिजिटल, सुपरमार्केट ग्रॉसरी सप्लाय आणि टाटा युनिस्टोरच्या संचालक होत्या.

वैयक्तिक आवडी –
आरती यांना संगीत ऐकणे, फिटनेस, चित्रपट पाहणे आणि व्यवस्थापनावरील पुस्तके वाचण्याची आवड आहे. १ मे २०२५ ते ३० एप्रिल २०३० या कालावधीसाठी त्यांची सीओओ म्हणून नियुक्ती झाली असून, त्या टीसीएसला नव्या उंचीवर नेण्यासाठी सज्ज आहेत.