Uddhav Thackeray Interview : माजी मुख्यमंत्री उद्धव ठाकरे यांची दैनिक सामनासाठी घेतलेल्या मुलाखतीचा दुसरा भाग प्रसिद्ध झाला आहे. ही मुलाखत दैनिक सामनाचे कार्यकारी संपादक संजय राऊत यांनी घेतली आहे. खरंतर राज्यात ठाकरे बंधू हे मराठीच्या मुद्यावर एकत्र आल्याने राजकीय मुद्यावरही दोघे एकत्र येतील, अशा चर्चा सातत्याने होत आहेत.

यावर उद्धव ठाकरे यांनी पुन्हा एकदा संकेत देणारे विधान केले आहे. तर दोन्ही नेते एकत्र आल्यावर महाविकास आघाडीचं काय होणार? असा सवाल त्यांना विचारण्यात आला. यावर उद्धव ठाकरे यांनी आतली गोष्ट सांगितली आहे. त्यांनी केलेल्या विधानामुळे महापालिका निवडणुकीत महाविकास आघाडी एकत्र लढण्याची शक्यता अत्यंत कमी असल्याचे संकेत त्यांच्या विधानावरून मिळत आहेत. महापालिका निवडणुकीत एकत्र लढावं की स्वबळावर हा ज्याचा त्याचा प्रश्न आहे, असे विधान उद्धव ठाकरे यांनी केले आहे.

पुढे ते म्हणाले ते म्हणाले, कारण मध्यंतरी काँग्रेसच्या नेत्यांशी माझं बोलणं झालं. ते म्हणाले की, कदाचित ते हा विषय स्थानिक पातळीवर सोडतील. ठिक आहे. तसं असेल तर तसं करू, असं उद्धव ठाकरे यांनी सांगितलं आहे. त्यामुळे महापालिका निवडणुका स्वबळावर लढणार असल्याचे संकेत मिळत आहेत.

आगामी स्थानिक स्वराज्य संस्थेच्या निवडणुकीत सर्वांचे लक्ष मुंबई महापालिकेवर लागले आहे. यावर देखील उद्धव ठाकरे यांनी  मुंबई महाराष्ट्राची राजधानी आहे, असे म्हणत ओरबाडली गेलीय मुंबई. प्रचंड लूट सुरू आहे. कशा प्रकारे म्हणण्यापेक्षा जिंकायच्या उद्देशानेच निवडणूक लढायची असते. तशी आम्ही लढू, महापालिकेवर भगवा झेंडा तसाच फडकवणार, असा निर्धार व्यक्त केला आहे.

…म्हणून मराठी-अमराठी वाद लावण्याचा प्रयत्न 

राज्यात मराठी अमराठी भाषिक गुण्या गोविंदाने राहतात. रक्तदान शिबीर करतो तेव्हा ते रक्त कुठल्या भाषिकाला जात नाही. आपण रुग्णासाठी रक्त देतो. इकडे गुण्यागोविंदाने नांदतात हे पाहवत नाही. म्हणून मराठी-अमराठी वाद लावण्याचा प्रयत्न सुरू आहे, असा आरोपही त्यांनी केला आहे.

हेही वाचा : “राज ठाकरेंनी माफी मागावी,” सरदार पटेलांविरोधात केलेल्या वक्तव्याचे गुजरातमध्ये पडसाद