Supriya Sule : बारामती आणि मुंबईतील गोळीबाराच्या घटनांवरून राष्ट्रवादी काँग्रेसच्या खासदार सुप्रिया सुळे यांनी राज्य सरकारवर निशाणा साधला आहे. राज्यात एकाच वेळी दोन ठिकाणी गोळीबाराच्या घटना घडत असताना सरकार नेमकं करतंय काय, असा सवाल त्यांनी उपस्थित केला. महाराष्ट्रातील कायदा आणि सुव्यवस्थेची परिस्थिती गंभीर असल्याचा दावा करत त्यांनी गृहखात्याच्या कारभारावर प्रश्नचिन्ह उपस्थित केलं. (Supriya Sule)

बाबा सिद्दीकी हत्या प्रकरणावरूनही सवाल!

बाबा सिद्दीकी यांच्या हत्या प्रकरणाचा उल्लेख करत सुप्रिया सुळे यांनी त्यांच्या कुटुंबाच्या सुरक्षेबाबत प्रश्न उपस्थित केले. बाबा सिद्दीकी यांच्या हत्येनंतर त्यांच्या कुटुंबाला सुरक्षा मिळाली का आणि या प्रकरणात पुढे काय कारवाई झाली, याचं उत्तर सरकारने द्यावं, अशी मागणी त्यांनी केली. (Supriya Sule)

मुंडे आणि देशमुख कुटुंबांशी संबंधित प्रकरणांचाही उल्लेख!

दरम्यान, बीडमध्ये असताना मुंडे आणि देशमुख कुटुंबांशी संबंधित हत्या प्रकरणांचा उल्लेख करत या प्रकरणांमध्ये नेमकं काय झालं, याची माहिती समोर यायला हवी, असं सुप्रिया सुळे म्हणाल्या. गृहखातं नेमकं काय करत आहे, असा सवालही त्यांनी उपस्थित केला. (Supriya Sule)

पुण्यातील गुन्हेगारीच्या आकडेवारीचा हवाला!

केंद्र आणि राज्यात एकाच विचारधारेचं सरकार असतानाही महाराष्ट्रातील गुन्हेगारीबाबत प्रश्न उपस्थित होत असल्याचं सुप्रिया सुळे यांनी म्हटलं. केंद्रीय गृहमंत्री अमित शाह यांच्या कार्यालयातील आकडेवारीचा हवाला देत पुणे शहर गुन्हेगारीच्या बाबतीत देशात पाचव्या, तर महाराष्ट्रात पहिल्या क्रमांकावर असल्याचा दावा त्यांनी केला. ही आकडेवारी माझी नसून केंद्रीय गृहमंत्र्यांच्या कार्यालयाची असल्याचं सांगत त्यांनी राज्यातील कायदा आणि सुव्यवस्थेबाबत सरकारने उत्तर द्यावं, अशी मागणी केली. (Supriya Sule)