A Glimpse into Sanjay Raut’s Book :  शिवसेना उद्धव बाळासाहेब ठाकरे पक्षाचे खासदार आणि लेखक संजय राऊत यांचं नवं पुस्तक लवकरच वाचकांच्या भेटीला येणार आहे. ‘बोध कीर्तन’ असं या पुस्तकाचं नाव असून, मेहता पब्लिशिंग हाऊसकडून ते प्रकाशित होणार आहे. संजय राऊत यांनी सोशल मीडिया प्लॅटफॉर्म ‘एक्स’वर पुस्तकाच्या मुखपृष्ठाची झलक शेअर करत याबाबत माहिती दिली आहे.

‘बोध कीर्तन’मध्ये नेमकं काय असणार?

नव्या पुस्तकाच्या स्वरूपाबाबत स्वतः संजय राऊत यांनी माहिती दिली आहे. त्यांच्या म्हणण्यानुसार, हे पुस्तक कोणत्याही ठराविक चौकटीत बांधलेलं नाही. बालपणीच्या आठवणी, आयुष्यात भेटलेल्या प्रिय व्यक्ती, त्यांच्या सहवासातून मिळालेले अनुभव, विचार, कविता, पत्रं, छोट्या कथा, सुविचार आणि मनातील भावना अशा विविध गोष्टींचा यात समावेश आहे.

याशिवाय युद्ध, प्रेम, प्राचीन कथांमधील बोधपर संवाद, धर्मकथा आणि प्रेरणादायी प्रसंगांचाही पुस्तकात समावेश असल्याचं राऊत यांनी सांगितलं आहे. त्यांच्या मते, वाचक हे पुस्तक सुरुवातीपासून शेवटपर्यंत किंवा आपल्या आवडीच्या कोणत्याही पानापासून वाचू शकतात.

‘हे पुस्तक म्हणजे माझं चतकोर जीवन’

आपल्या एक्स पोस्टमध्ये संजय राऊत यांनी पुस्तकाला आपल्या जीवनाचा एक भाग असल्याचं म्हटलं आहे. लहान वयात मोठं आयुष्य जगल्याचं सांगताना त्यांनी अनेक मोठ्या व्यक्तींच्या सहवासातून समृद्ध झाल्याचा उल्लेख केला आहे. त्याचबरोबर प्रवासात भेटलेल्या सामान्य माणसांचाही त्यांच्या आयुष्यावर प्रभाव पडल्याचं त्यांनी नमूद केलं आहे. पुस्तकात काही लहान, काही मोठी, तर काही केवळ एका ओळीची प्रकरणं असल्याचंही राऊत यांनी सांगितलं आहे. त्यामुळे ‘बोध कीर्तन’ हे त्यांच्या आधीच्या पुस्तकांपेक्षा वेगळ्या स्वरूपाचं असण्याची शक्यता आहे. या पुस्तकांची वाचकांना मोठी उत्सुकता लागली आहे.

pic.twitter.com/N89AfBwf54

— Sanjay Raut (@rautsanjay61) September 19, 2026

‘नरकातला स्वर्ग’नंतर नव्या पुस्तकाची उत्सुकता

संजय राऊत यांच्या ‘नरकातला स्वर्ग’ या पुस्तकाचीही यापूर्वी मोठी चर्चा झाली होती. या पुस्तकात त्यांनी आर्थर रोड कारागृहातील १०४ दिवसांचे अनुभव, ईडीची कारवाई आणि तुरुंगातील प्रसंग यांसह विविध विषयांवर लेखन केलं होतं. आता ‘बोध कीर्तन’मधून राऊत नेमके कोणते अनुभव आणि आठवणी मांडणार, याकडे वाचकांचं लक्ष लागलं आहे.

संजय राऊतांची एक्सवरील पोस्ट

हे पुस्तक म्हणजे माझं चतकोर जीवन आहे. मी लहान वयात मोठं आयुष्य जगलो. असंख्य मोठ्या माणसांच्या सहवासाने मी समृद्ध झालो. प्रवासात लहान माणसंही भेटली. त्यामुळे यात काही लहान प्रकरणं आहेत. काही थोडी मोठी आहेत. काही एका ओळीची आहेत. यात विचार, सुविचार, काव्य, पत्र, लहान कथा, उद्धरणे, केस स्टडीज, मनातला उद्रेक, भावना असं बरंच आहे. अनुभवाचं संचित आहे. थोडं तत्त्वज्ञान, आवडणाऱ्या व्यक्ती, युद्ध, प्रेम, प्राचीन काळातला बोधक संवाद, धर्मकथा, प्रेरणेचे क्षण आहेत. तुम्ही हे जसे हवे तसे वाचू शकता. पहिल्या पानापासून शेवटपर्यंत किंवा शेवटच्या पानापासून सुरुवातीला येऊ शकता किंवा मध्येच पान उघडून डुबकी मारू शकता !

Top 15 News: राज्यातील सर्वात लांब उड्डाणपुलाचे आज उद्घाटन ते तृणमूलच्या दोन गटांना नवीन नावे आणि चिन्हे; जाणून घ्या TOP 15 News