Moon temperature dipped । कोरोना काळात लॉकडाऊन दरम्यान, पृथ्वीच्या तापमानात आणि प्रदूषणात घट झाली होती.त्याचा प्रभाव चंद्रापर्यंत दिसल्याचा दावा भारतीय संशोधकांनी केला आहे. एप्रिल आणि मे महिन्यात कडक लॉकडाऊन लागू असताना चंद्राचे तापमानही सामान्यपेक्षा कमी झाले होते असा दावा रॉयल ॲस्ट्रॉनॉमिकल सोसायटीच्या अभ्यासात करण्यात आला आहे. वैज्ञानिक के दुर्गा प्रसाद आणि जी अंबिली यांनी 2017 ते 2023 या कालावधीत चंद्रावरील विविध ठिकाणच्या तापमानाचा डेटा गोळा केला आहे. यातून असे आढळून आले आहे की, इतर वर्षांच्या तुलनेत 2020 सालच्या लॉकडाऊनच्या काळातील तापमान कमी असल्याचे आढळून आले. चंद्रावरील तापमानात घट होण्यामागिल कारण सांगताना वैज्ञानिकांनी म्हटले की, ‘पृथ्वीवरील उद्यागधंदे बंद झाल्यामुळे किरणोत्सर्ग कमी झाला आणि त्याचा परिणाम चंद्रावरही दिसून आला. त्यामुळे 2020 मध्ये चंद्रावरील तापमानात घट झाली होती. त्यानंतर पुढील दोन वर्षात तापमानात पुन्हा वाढ झाली कारण पृथ्वीवरील सर्व उद्योगधंदे पुन्हा सुरू झाले होते. नासाच्या लूनर ऑर्बिटरकडून याबाबतचा डेटा गोळा करण्यात आला होता. या अभ्यासासाठी सात वर्षांचा डेटा घेण्यात आला. यापैकी तीन वर्षे 2020 पूर्वीची आणि तीन वर्षे नंतरची आहेत. पृथ्वीवरील उद्योगधंद्यांमुळे हरितगृह वायूंचे उत्सर्जन वाढते. यामुळे पृथ्वीच्या वातावरणातील किरणोत्सर्गामुळे चंद्राच्या तापमानावरही परिणाम होतो.चंद्र हा पृथ्वीच्या किरणोत्सर्गाचा प्रवर्धक म्हणून काम करतो. या संशोधनातून चंद्राच्या तापमानावर मानव कसा प्रभाव टाकू शकतो हे समोर आले आहे. तसेच सूर्यावरील वादळामुळेही चंद्राच्या तापमानावरही परिणाम होतो. मात्र या तापमान बदलाचा चंद्राच्या पृष्टभागावर काय परिणान होते ते अद्याप समोर आलेले नाही.
