Shekhar Suman: बॉलिवूड अभिनेता आणि सूत्रसंचालक शेखर सुमन  (Shekhar Suman ) यांनी अभिनेत्री माधुरी दीक्षितसोबतच्या पहिल्या भेटीची एक खास आठवण नुकत्याच दिलेल्या मुलाखतीत सांगितली. करिअरच्या सुरुवातीच्या काळात माधुरीला प्रथमच पाहिल्यानंतर तिच्या सौंदर्याने आपण अक्षरशः भारावून गेलो होतो, असे त्यांनी सांगितले. त्या काळातील काही आठवणींना उजाळा देताना त्यांनी माधुरीसोबत काम करण्याचा अनुभवही शेअर केला.  (Shekhar Suman)

एका मुलाखतीत बोलताना शेखर सुमन यांनी त्यांच्या सुरुवातीच्या चित्रपटांबद्दल आणि त्या काळातील अनेक कलाकारांसोबतच्या कामाच्या आठवणी सांगितल्या. त्यांनी अभिनेत्री रेखासोबत काम करताना आलेला अनुभव सांगितला. रेखा त्या काळात मोठ्या स्टार होत्या, तरी त्यांनी नवोदित कलाकार म्हणून आपल्याला खूप सहकार्य केले, असे त्यांनी नमूद केले.

यानंतर त्यांनी माधुरी दीक्षितबरोबरच्या पहिल्या चित्रपटाची आठवण सांगितली. शेखर सुमन आणि माधुरी यांनी ‘मानव हत्या’ या चित्रपटात एकत्र काम केले होते. त्या वेळी माधुरीने ‘अबोध’ या चित्रपटातून बॉलिवूडमध्ये पदार्पण केले होते. मात्र, तिला त्यावेळी फारशी ओळख मिळाली नव्हती. नंतर ‘तेजाब’ चित्रपटातील ‘एक दो तीन’ या गाण्यामुळे ती देशभरात लोकप्रिय झाली.   (Shekhar Suman)

 

शेखर सुमन यांनी सांगितले की, दिग्दर्शकाने त्यांना एका नवोदित अभिनेत्रीबरोबर काम करण्याची तयारी आहे का, असे विचारले होते. त्यावर त्यांनी लगेच होकार दिला. त्यांचे म्हणणे होते की, जर रेखासारखी मोठी अभिनेत्री नवोदित कलाकार असलेल्या माझ्यासोबत काम करू शकते, तर मीही नव्या अभिनेत्रीबरोबर काम करण्यात काहीच अडचण मानत नाही.

माधुरीबरोबरच्या पहिल्या भेटीबद्दल सांगताना त्यांनी एक रंजक किस्साही शेअर केला. ते म्हणाले की, त्या काळात माधुरी अंधेरीमध्ये त्यांच्या घराजवळ राहत होती. तिला भेटण्याची इच्छा असल्यामुळे ते मोटारसायकलवरून तिच्या घरी गेले. तिला पहिल्यांदा पाहताच तिच्या सौंदर्याने ते भारावून गेले.

“मी तिला पाहिलं आणि माझ्या तोंडून सहज शब्द बाहेर पडले, ‘ही किती सुंदर मुलगी आहे!’ माझ्यासाठी ती एक मोठी शोधच होती,” असे शेखर सुमन यांनी सांगितले. त्या पहिल्या भेटीची आठवण आजही त्यांच्या मनात ताजी असल्याचे त्यांनी नमूद केले.   (Shekhar Suman)

माधुरी दीक्षितने पुढे आपल्या अभिनय, नृत्य आणि मेहनतीच्या जोरावर बॉलिवूडमध्ये वेगळे स्थान निर्माण केले. ‘तेजाब’, ‘दिल’, ‘बेटा’, ‘हम आपके हैं कौन’, ‘दिल तो पागल है’ अशा अनेक सुपरहिट चित्रपटांमधून तिने प्रेक्षकांची मने जिंकली. आजही ती हिंदी चित्रपटसृष्टीतील सर्वाधिक लोकप्रिय अभिनेत्रींपैकी एक मानली जाते.

दरम्यान, शेखर सुमन सध्या त्यांच्या ‘शेखर टुनाईट’ या शोचे सूत्रसंचालन करत आहेत. या कार्यक्रमात ते विविध क्षेत्रांतील प्रसिद्ध व्यक्तींच्या मुलाखती घेत असतात. त्यांच्या या मुलाखतीतून अनेक कलाकारांच्या करिअरमधील रंजक आणि यापूर्वी फारशा न ऐकलेल्या आठवणी समोर येत असतात.