प्रभात वृत्तसेवा
पुणे – राज्यातील पावसाचा जोर ओसरला असून पुढील दोन दिवसांत पावसाचे प्रमाण आणखी कमी होईल. दि. ५ ऑक्टोबरला सिंधुदुर्ग, अहिल्यानगर व त्याच्या घाट परिसरात आणि सांगली जिल्ह्यात मेघगर्जनेसह पावसाच्या हलक्या ते मध्यम सरी पडतील, त्यामुळे या जिल्ह्यांना पुढील २४ तासासाठी भारतीय हवामानशास्त्र विभागाने यलो अलर्ट दिला आहे. तर, दोन दिवसानंतर पाऊस विश्रांती घेण्याची शक्यता वर्तविण्यात आली असल्याने सोमवार (दि ६) नंतर कमाल व किमान तापमानात वाढ होऊन आॅक्टोबर हिट सुरू होऊ शकते.

ईशान्य बिहार ते पूर्व विदर्भापर्यंत असलेले द्रोणीय क्षेत्र आज स्थिर स्थितीमध्ये आहे. तर, परतीचा मान्सूनचा प्रवासही स्थिर असून पुढील काही दिवसात परतीचा मान्सून आगेकुच करेल, अशी शक्यता हवामानशास्त्र विभागाकडून वर्तविण्यात आली आहे. राज्यात पुढील दोन दिवसांत कोकण-गोव्यात बहुतांश ठिकाणी, मध्य महाराष्ट्रात तुरळक ठिकाणी तर विदर्भ आणि मराठवाड्यात काही ठिकाणी पाऊस पडेल.

पुढील २४ तासांत कोकणातील सिंधुदुर्ग, अहिल्यानगर परिसर व घाट विभाग, सांगली आणि मराठवाड्यातील बहुतांश विभागात ततसेच विदर्भातील बऱ्याच ठिकाणी मेघगर्जनेसह पाऊस पडण्याची शक्यता हवामानशास्त्र विभागाने वर्तविली आहे. त्यामुळे याठिकाणी यलो अलर्ट दिला आहे.