मोरगाव : राम मंदिराच्या उभारणीसाठी शिवसेनेचे असंख्य कार्यकर्तेप्रसंगी तुरुंगात गेले. मात्र, राम मंदिराच्या उभारणीनंतर श्रीरामाची दानपेटी, अलंकार व सीतामाईचे मंगलसूत्र भारतीय जनता पार्टीच्या राजवटीत लुटून चौदाशे कोटी रुपये कमावले असल्याची घणाघाती टीका खासदार संजय राऊत केले. बारामती तालुक्यातील मोरगाव येथे शिवसेनेच्या मध्यवर्ती कार्यालय उद्घाटन व रामरक्षा पठण कार्यक्रमप्रसंगी ते बोलत होते.

बारामती तालुक्यातील मोरगाव येथे शिवसेना उद्धव बाळासाहेब ठाकरे या पक्षाच्या मध्यवर्ती कार्यालयाचे उद्घाटन शिवसेनेचे ज्येष्ठ नेते खासदार संजय राऊत यांच्या हस्ते झाले. यावेळी आदिराज कोठाडिया, संजय काळे, शोकत बागवान, सर्वेश वाघ, राहुल शिंदे, नितीन देवकाते, संभाजी शिंदे, भगवान गोफणे, दीपक जगताप, संतोष जगताप, ऋषिकेश भोसले, परेश भापकर, दत्ता लोणकर उपस्थित होते. मध्यवर्ती कार्यालयाच्या उद्घाटनानंतर मोरगाव येथील मुख्य चौकात रामरक्षा पठण करण्यात आले. यावेळी मोरगाव, वडगाव निंबाळकर, बारामती, तरडोली, सुपे, लोणी भापकर, जळगांव, फोंडवाडा येथील शेकडो लोकांनी शिवसेनेमध्ये प्रवेश केला.

राऊत म्हणले की, नरेंद्र मोदी यांच्या खात्यामध्ये साडेदहा हजार कोटी रुपये आहेत. तरीही रामांसारख्या पवित्र मंदिराची दानपेटी लुटून 1400 कोटी रुपये त्यांनी कमवले. रामाचे रक्षण करण्यासाठी या कार्यक्रमाला बारामतीकरांच्या नेत्या सुनेत्रा पवार यांचे नाव न घेता त्यांनीही सहभाग घेण्याची आवश्यकता होती. हे आंदोलन पुणे, नाशिक, आता बारामतीमध्ये होत असल्याचेही त्यांनी सांगितले. रामाच्या दानपेटी चोरणाऱ्यांना आपण सर्वांनी जाब विचारावा.

कार्यक्रमाचे आयोजक शिवसेनेचे तालुकाध्यक्ष हनुमंत भापकर म्हणाले, बारामतीचा जिरायती भागाच्या जोरावर गेले साठ वर्ष मतांचे राजकारण करीत पवार कुटुंबीयांनी सत्ता मिळवली. मात्र, अजूनही तालुक्याचा पश्चिम भाग जिरायतीच आहे. येथून पाणी उस्मानाबादला जाऊ शकते. मात्र, बारामती तालुक्याच्या बावीस गावांना अद्याप पाण्यासाठी टाहो फोडावा लागत आहे.

सोमेश्‍वर कारखान्याच्या पदाबाबत टीकास्त्र

भापकर म्हणाले, बारामती तालुक्यात 60 वर्षे पवार कुटुंबीयांना निवडून दिले. मात्र, ते पाणी देऊ शकले नाहीत. सोमेश्वर कारखान्याचे चेअरमन गेल्या 40 वर्षात केवळ चारच व्यक्तींना मिळाले आहे. सामान्य व्यक्ती या पदापर्यंत पोहोचू शकत नाही. तालुक्यात आमदार किंवा खासदार हे केवळ पवार कुटुंबातील व्यक्तीच आहेत. सामान्य कार्यकर्त्यांची उपमुख्यमंत्री अजित पवार यांच्या निधनानंतर वाताहत होत आहे.तालुक्याच्या जिरायती भागातील लोकांना न्याय मिळवून देण्यासाठीच हे कार्यालय स्थापन केल्याचे मत त्यांनी व्यक्त केले.

राष्ट्रवादीच्या महिलेचा गोंधळ

रामरक्षा पठण कार्यक्रमप्रसंगी अजित पवार यांच्या राष्ट्रवादी काँग्रेसशी संबंधित ग्रामपंचायत सदस्य स्वाती सतीश शेरे-गायकवाड यांनी गोंधळ घातला. संजय राऊत यांना प्रश्न विचारायचे असल्याचे सांगत त्यांनी आंदोलनस्थळी स्थानिक ठाकरे गटाच्या पदाधिकाऱ्यांवर भ्रष्टाचाराचे आरोप केले. यानंतर वातावरण तापले. त्यामुळे परिस्थिती शांत करण्यासाठी संबंधित महिलेला पोलिसांनी ताब्यात घेतले.