ओटावा – कॅनडाचे पंतप्रधान जस्टिन ट्रुडो यांनी कॅनेडियन आयातीवरील अमेरिकेच्या वाढत्या शुल्काविरुद्ध लढण्याचे आश्वासन दिले आहे. त्यांनी याला व्यापार युद्ध म्हटले असून याचा प्रामुख्याने अमेरिकेलाच तोटा होईल असा दावा त्यांनी केला आहे. कॅनडा आपल्या जागी योग्य आहे, परंतु आम्ही लढाईपासून मागे हटणार नाहीत, विशेषतः जेव्हा देशाचे कल्याण धोक्यात असेल तेव्हा तर माघार अजिबातच घेतली जाणार नाही असे ट्रुडो यांनी नमूद केले.

पहिल्या टप्प्यात, अमेरिकेतून येणाऱ्या ३० अब्ज कॅनेडियन डॉलर्स किमतीच्या वस्तूंवर २५ टक्के कर लादला जाणार आहे. यामध्ये कार, स्टील आणि अॅल्युमिनियम सारख्या प्रमुख उत्पादनांचा समावेश आहे. मंगळवारी पार्लमेंट हिलमधून बोलताना, ट्रुडो यांनी अमेरिकेचे अध्यक्ष डोनाल्ड ट्रम्प यांच्या शुल्क लादण्याच्या निर्णयावर टीका केली आणि ते म्हणाले की ते अत्यंत मूर्खपणाचे काम आहे. ट्रुडो यांनी व्लादिमीर पुतिन यांच्यासोबत काम करण्याच्या ट्रम्प यांच्या तर्कावरही प्रश्नचिन्ह उपस्थित केले. पुतीन यांचा उल्लेख ट्रुडो यांनी खूनी आणि हुकूमशहा असा केला होता. तर जवळचा मित्र आणि भागीदार असलेल्या कॅनडावर शुल्क लादले जात आहे याबाबत आश्‍चर्य व्यक्त केले. आज अमेरिकेने कॅनडाविरुद्ध व्यापार युद्ध सुरू केले आहे, मात्र कॅनडा हा त्यांचा सर्वात जवळचा साथीदार आणि सहयोगी आहे, त्यांचा सर्वात जवळचा मित्र आहे असेही ट्रुडो म्हणाले.
ट्रुडो यांनी अमेरिकन जनतेला संबोधित करताना इशारा दिला की, या शुल्कामुळे महागाई वाढेल आणि अमेरिकन नोकऱ्यांना धक्का बसेल, विशेषतः कॅनडातील साहित्य किंवा ग्राहकांवर अवलंबून असलेल्या कामाच्या ठिकाणी याचा फटका बसेल. उत्तर अमेरिकन लोकांसाठी समृद्धी सुनिश्चित करण्यासाठी दोन्ही देशांनी एकत्र काम करावे, असे सांगून त्यांनी ट्रम्प यांना पुनर्विचार करण्याचे आवाहन केले आणि आज या शुल्कांचे कोणतेही औचित्य किंवा आवश्यकता नाही असेही ते म्हणाले.