Donald Trump – इराणसोबत सुरू असलेल्या युद्धाला एक महिना पूर्ण झाला असताना, अमेरिकेचे राष्ट्राध्यक्ष डोनाल्ड ट्रम्प यांनी बुधवारी रात्री देशाला संबोधित केले. इराणमधील आमची महत्त्वाची धोरणात्मक उद्दिष्टे पूर्ण होण्याच्या मार्गावर असून, अमेरिकन सैन्य लवकरच हे काम फत्ते करेल, असा विश्वास ट्रम्प यांनी आपल्या पहिल्या ‘प्राईम-टाइम’ भाषणात व्यक्त केला. सुमारे २० मिनिटांच्या या भाषणात ट्रम्प यांनी अमेरिकन लष्करी कारवायांच्या यशाचा पाढा वाचला. मात्र, त्यांनी इराणला कडक इशाराही दिला. “येत्या दोन ते तीन आठवड्यांत आम्ही इराणवर अत्यंत भीषण हल्ले करणार आहोत. आम्ही त्यांना पुन्हा ‘दगडाच्या युगात’ (स्टोन एज) नेऊन सोडू, जिथे राहण्यास ते पात्र आहेत,” असे प्रक्षोभक विधान ट्रम्प यांनी केले. US-Iran War: ट्रम्प यांनी सांगितले की, अमेरिकेच्या बी-२ बॉम्बर्सनी इराणची अणुकेंद्रे अशा प्रकारे उध्वस्त केली आहेत की, तिथल्या ‘अणुधुळी’जवळ जाण्यासाठीही आता अनेक महिने लागतील. या जागांवर उपग्रहाद्वारे कडक पाळत ठेवली जात असल्याचेही त्यांनी नमूद केले. इराणने होर्मुझ सामुद्रधुनी रोखल्यामुळे जागतिक स्तरावर इंधनाचे दर गगनाला भिडले आहेत. यावर बोलताना ट्रम्प यांनी मित्रराष्ट्रांना आणि तेल अवलंबून असलेल्या देशांना स्वतःहून पुढाकार घेऊन हा मार्ग मोकळा करण्याचे आवाहन केले. दक्षिण कोरिया, जपान आणि चीन यांनी स्वतःची गरज ओळखून या भागात सुरक्षा पुरवावी, असे ते म्हणाले. महत्वाचे म्हणजे ट्रम्प यांनी भाषणात अमेरिकन भूदलाला इराणमध्ये पाठवण्याबाबत किंवा नाटोच्या सहकार्याबाबत कोणतेही भाष्य केले नाही. युद्धाचा आर्थिक फटका ! २८ फेब्रुवारी रोजी युद्ध सुरू झाल्यापासून आंतरराष्ट्रीय स्तरावर तेलाच्या किमतीत ४० टक्क्यांहून अधिक वाढ झाली आहे, ज्यामुळे अमेरिकेसह जगभरात महागाईचा प्रश्न गंभीर बनला आहे. इराणचे राष्ट्राध्यक्ष मसूद पेझेश्कियान यांनी ट्रम्प यांचा दावा फेटाळत, हे युद्ध अमेरिकन जनतेच्या हिताचे नसल्याचे म्हटले आहे. ट्रम्प यांनी मात्र ३२ दिवसांत प्रचंड विजय मिळवल्याचा दावा करत मोहिमेच्या विजयासाठी अधिक वेळ मागितला आहे.