Satara: अदानीचा घोटाळा उघड करणारच; पण तारळी प्रकल्पही रद्द करा!
Satara भारत सरकारच्या कागदपत्रांमध्ये पर्यावरणीय नियोजन व प्रदूषण नियंत्रणासाठी 3 हजार 934.08 लाख रुपये, तर ऑपरेशन आणि देखभालीसाठी 2 हजार 753.20 लाख रुपये नमूद असल्याचे पाटणकर यांनी निदर्शनास आणले.

Satara: कंपनीच्या तारळी पंप स्टोरेज प्रकल्पातील कथित आर्थिक अनियमितता उघड झाली असून, कंपनीवर कठोर कारवाई झालीच पाहिजे. मात्र, केवळ दंडात्मक कारवाई करून हा प्रश्न सुटणार नाही. तारळी खोर्यातील जनतेला उद्ध्वस्त करणारा हा प्रकल्पच तातडीने रद्द करावा, अशी ठाम मागणी श्रमिक मुक्ती दलाचे नेते डॉ. भारत पाटणकर यांनी पत्रकार परिषदेत केली. दरम्यान, अदानी कंपनीच्या या प्रकल्पातून हाकलून देण्याची आक्रमक भूमिका त्यांनी मांडली.
डॉ. पाटणकर म्हणाले, तारळी पंप स्टोरेज प्रकल्पाची प्रत्यक्ष किंमत 5 हजार 675 कोटी रुपये असताना, कंपनीचे मुख्य कार्यकारी अधिकारी नरेश तेलगू यांनी प्रमुख मुख्य वनसंरक्षक (वन्यजीव) यांच्याकडे प्रकल्पाची किंमत केवळ 56.75 कोटी रुपये असल्याचे नमूद केल्याचा गंभीर आरोप डॉ. पाटणकर यांनी केला. राज्य शासनाकडेही अशीच माहिती सादर करण्यात आली असून प्रकल्पाच्या किमतीत तब्बल शंभरपट तफावत असल्याचा मुद्दा मानद वन्यजीव वॉर्डन रोहन भाटे (शहा) यांनी उघडकीस आणल्याचे त्यांनी स्पष्ट केले. या प्रकरणाची दिल्ली सरकारच्या पातळीवरून चौकशी करण्याचे आदेश झाल्याचाही त्यांनी उल्लेख केला.
भारत सरकारच्या कागदपत्रांमध्ये पर्यावरणीय नियोजन व प्रदूषण नियंत्रणासाठी 3 हजार 934.08 लाख रुपये, तर ऑपरेशन आणि देखभालीसाठी 2 हजार 753.20 लाख रुपये नमूद असल्याचे पाटणकर यांनी निदर्शनास आणले. प्रकल्पाच्या एकूण खर्चाच्या चार टक्के रक्कम सह्याद्री व्याघ्र प्रकल्पाला देण्याची तरतूद होती. त्यानुसार सुमारे 227 कोटी रुपये मिळणे अपेक्षित होते. मात्र, प्रकल्पाच्या खर्चाबाबत दाखवण्यात आलेल्या तफावतीमुळे या निधीच्या गणितावरही परिणाम होण्याची शक्यता त्यांनी व्यक्त केली.
प्रकल्पामुळे तारळी खोर्याचे भवितव्य धोक्यात
या प्रकल्पामुळे स्थानिकांच्या जमिनी संपादित करण्यासाठी एजंटांमार्फत दबाव आणला जात असून जमीन विकण्यास विरोध करणार्या ग्रामस्थांमध्ये फूट पाडण्याचे प्रयत्न होत असल्याचा आरोप त्यांनी केला. कंपनीच्या पाणी वापरामुळे तारळी नदीकाठच्या लाभक्षेत्रात पाणीटंचाई निर्माण होणार असून कराड, कोरेगाव, माण आणि खटाव तालुक्यांतील शेतीला मिळणार्या पाण्यावरही याचा विपरीत परिणाम होऊन हजारो एकर जमीन दुष्काळाच्या विळख्यात राहण्याची भीती आहे. बॅटरी स्टोअरेज, पवनऊर्जा आणि सौरऊर्जेसारखे पर्याय उपलब्ध असताना पर्यावरण आणि स्थानिक जनजीवन धोक्यात आणणारे पंप स्टोरेज प्रकल्प कशासाठी, असा सवाल त्यांनी उपस्थित केला.
केवळ अदानी कंपनीच्या कथित अनियमिततेची चौकशी करून भागणार नाही, तर तारळी-अदानी प्रकल्पासह महाराष्ट्रातील सर्व पंप स्टोरेज प्रकल्प रद्द करावेत, अशी मागणी डॉ. पाटणकर यांनी यावेळी केली. जंगल, वन्यजीव, पाणी, शेती आणि स्थानिक नागरिकांचे जीवन सुरक्षित ठेवण्यासाठी हा प्रकल्प कायमचा गुंडाळणे हाच एकमेव पर्याय असल्याचेही त्यांनी ठामपणे सांगितले.





