Congress Mumbai : दिवाळीनंतर होऊ घातलेल्या स्थानिक स्वराज्य संस्थांच्या निवडणुकीमुळे आता राजकीय घडामोडींना वेग प्राप्त झाला आहे. अवघ्या महाराष्ट्राचे लक्ष लागून असलेल्या मुंबई महापालिकेवर सत्ता आणण्यासाठी महायुतीमधील घटक पक्षांकडून जोरदार तयारी करण्यात येत आहे.

तर दुसरीकडे महाविकास आघाडीतीली मोठा भाऊ असलेल्या काँग्रेस पक्षाने देखील मुंबई महापालिकेसाठी रणनिती आखली असून, निवडणुकीसाठी १५ जणांची टीम करण्यात आली आहे. पक्षातील या पंधरा जणांवर मोठी जबाबदारी सोपविण्यात आली आहे.

मंगळवारी रात्री उशिरा मुंबई काँग्रेसच्या जम्बो कार्यकरणीची घोषणा करण्यात आली आहे. आगामी मुंबई महापालिकेच्या निवडणुका लक्षात घेता ही घोषणा अत्यंत महत्वाची मानली जात आहे. याशिवाय मुंबई काँग्रेसचे कोषाध्यक्ष, वरिष्ठ उपाध्यक्ष, उपाध्यक्ष, महासचिव, सचिव आणि इतर महत्त्वाच्या पदांची घोषणा करण्यात आली. या नेत्यांमध्ये खासदार चंद्रकांत हंडोरे, माजी मंत्री अस्लम शेख, आमदार अमीन पटेल, आमदार भाई जगताप, चरणसिंह सप्रा, ज्येष्ठ नेते नसीम खान, सुरेश शेट्टी या नेत्यांचा समावेश करण्यात आला आहे.

वर्षा गायकवाड यांच्यावर मोठी जबाबदारी 

काँग्रेस पक्षाने खासदार वर्षा गायकवाड यांच्यावर सर्वात मोठी जबाबदारी सोपवली आहे. त्यांची राजकीय घडामोडी समितीचे अध्यक्ष मुंबई पदावर नियुक्ती करण्यात आली आहे. या समितीच्या नावांची घोषणा काँग्रेस पक्षाने एक पत्रक प्रसिद्ध करून केली आहे.

३४ जणांचा समावेश

तसेच मुंबई काँग्रेसच्या कोषाध्यपदी मुंबईतील अल्पसंख्यांक समाजाचे नेते अस्लम शेख यांच्याकडे सोपविण्यात आली आहे. वरिष्ठ उपाध्यक्षपदी आमदार अमीन पटेल, अशोक जाधव यांची नियुक्ती करण्यात आली असून उपाध्यक्षपदी एकूण ३४ जणांना संधी देण्यात आली आहे.

याशिवाय पक्षाने सहा जिल्हाध्यक्षांच्याही नावाचीही घोषणा केली आहे. यामध्ये दक्षिण मुंबईची जबाबदारी रवी बावकर, कचरू यादव, तर उत्तर मध्य अर्शद आझमी, उत्तर मुंबई राजपाल यादव, उत्तर पूर्वसाठी केतन शाह, उत्तर पश्चिमसाठी भावना जैन यांची नावे जाहीर करण्यात आली आहे.

सचिन सावंत मुख्य प्रवक्ते 

सगळ्यात महत्वाचे म्हणजे मुबंई काँग्रेसचे नेते सचिन सावंत यांची मुबंई काँग्रेसच्या मुख्य प्रवक्तेपदावर नियुक्ती करण्यात आली आहे. याशिवाय इतर पाच प्रवक्त्यांच्या नावे आहेत. यामध्ये यामध्ये माजी नगरसेवक शीतल म्हात्रे, आनंद शुक्ला, शकील चौधरी, सुरेशचंद्र राजहंस आणि सय्यद हुसैन यांचा समावेश आहे.

हेही वाचा : Satara news: राकेश किशोर यांचे हे कृत्य निषेधार्ह