Israel War cost: इस्रायल आणि अमेरिकेने इराणविरोधात सुरू केलेल्या युद्धाला आता पाच दिवस झाले. दरम्यान या युद्धाचा इस्रायलला रोज तीन अब्ज डॉलर म्हणजे 27 हजार कोटी रुपये खर्च येत आहे. त्यामुळे इस्रायलच्या अर्थव्यवस्थेवर वेगाने नकारात्मक परिणाम होत आहे. यासंदर्भात इस्रायलच्या अर्थ मंत्रालयाने लष्कर प्रमुखांना एक पत्र पाठवून ही माहिती दिली आहे. युद्ध सुरू झाल्यापासून इस्रायलमध्ये नागरिकांच्या हालचालीवर मर्यादा आणण्यात आल्या आहेत. यामुळे इस्रायलमधील व्यवहार ठप्प झाले आहेत. एकीकडे रोज तीन अब्ज डॉलर खर्च होत असताना इस्रायलची अर्थव्यवस्था ठप्प झाल्यामुळे देशाच्या उत्पन्नावर परिणाम झालेला आहे. त्यामुळे लष्कराने नागरिकांच्या हालचालीवरील मर्यादा काही प्रमाणात शिथिल करण्याची गरज असल्याचे मत या पत्रात व्यक्त करण्यात आले आहे. लष्कर गुरुवारपासून नागरिकांना काही प्रमाणात उद्योगधंदे सुरू करण्याची परवानगी देईल अशी अपेक्षा व्यक्त करण्यात आली आहे. सुरक्षितता महत्वाची आहे. मात्र त्याचबरोबर अर्थव्यवस्था चालू राहणे तितकेच गरजेचे आहे. त्यामुळे अंतर्गत अर्थव्यवस्था ठप्प करू नये आणि ती हळूहळू सुरक्षित वातावरणात चालू राहावी अशी अपेक्षा अर्थमंत्रालयाने केली आहे. इस्रायल आणि हमासदरम्यान गेल्या अडीच वर्षापासून तणाव आहे. अशा परिस्थितीत अर्थव्यवस्थेचे बरेच नुकसान झाले आहे. आता इस्रायल आणि इराणदरम्यान युद्ध सुरू झालेले आहे. त्यामुळे अर्थव्यवस्थेसमोर आणखी गंभीर पेच प्रसंग निर्माण झाला आहे. अशा परिस्थितीत अर्थव्यवस्था रुळावर शक्य तितक्या लवकर आणण्याची गरज निर्माण झाली आहे. त्यामुळे अर्थव्यवस्थेचे नुकसान टाळण्यासाठी कामकाज अंशतः सुरू करू देण्याची गरज आहे. तसे झाले तर युद्धाचा खर्च कमी केल्यासारखे होईल असा युक्तिवाद करण्यात आला आहे.
