हडपसर : “महाराष्ट्रातील ऐंशी मतदारसंघात गद्दारी झाली.त्यात हडपसरचाही समावेश होता. मात्र, या संघर्षाच्या काळात शहर अध्यक्ष प्रशांत जगताप ढाल बनून पवार साहेबांच्या सोबत राहिले. गद्दारीचा कलंक कितीही गुलाबी रंग लावला तरी पुसला जाणार नाही. ही निवडणूक विचारांची, महाराष्ट्र धर्म जागवण्याची आहे. चोरी व लबाडी करून मोठी होणारी ही माणसे आहेत.

त्यांना इमानदारीने भाजी-भाकरी खाणारा चांगला माणूस घरी बसवणार आहे,” अशी टीका राष्ट्रवादी काँग्रेस शरदचंद्र पवार पक्षाचे खासदार डॉ.अमोल कोल्हे यांनी केली. हडपसर मतदारसंघातील महाविकास आघाडीचे अधिकृत उमेदवार प्रशांत सुदाम जगताप यांच्या प्रचारार्थ हडपसरमध्ये आयोजित जाहीर सभेत डॉ. अमोल कोल्हे बोलत होते.

काँग्रेस पक्षाचे ज्येष्ठ नेते माजी मंत्री बाळासाहेब शिवरकर, माजी आमदार मोहन जोशी, माजी महापौर अंकुश काकडे,माजी उपमहापौर निलेश मगर, माजी नगरसेवक योगेश ससाणे, विजय देशमुख, दिलीप आबा तुपे, दिलीप शंकर तुपे, समीर तुपे, प्रवीण तुपे, कुमार तुपे, प्रशांत सुरसे, नितीन आरु, महेंद्र बनकर, गणेश फुलारे, प्रा.विद्या होडे यांच्यासह महाविकास आघाडीतील सर्वच घटक पक्षांचे नेते, पदाधिकारी व कार्यकर्ते मोठ्या संख्येने उपस्थित होते. या वेळी अपक्ष उमेदवार सुशील मते यांनी प्रशांत जगताप यांना पाठींबा दिला.

डॉ. अमोल कोल्हे म्हणाले, पक्ष, चिन्ह पळवून आपल्या बापाशी गद्दारी करणाऱ्यांना घरी बसवावे लागेल.”राज्यात फिरतोय, महाविकास आघाडीचे सरकार येणार हे स्पष्ट दिसतेय. सरकार येताच सहा महिन्यात स्थानिक स्वराज्य संस्थांच्या निवडणुका होतील. हडपसर स्वतंत्र महापालिका होईल. त्यासाठी काळजीपूर्वक ‘तुतारी वाजवणारा माणूस’ चिन्हासमोरील बटण दाबून प्रशांत जगताप यांना मतदान करा.

प्रशांत जगताप म्हणाले, “ही निवडणूक गद्दारी विरुद्ध निष्ठा अशी आहे. या राज्यात ८० आमदार विकले गेले. पक्षाशी त्यांनी गद्दारी केली.हडपसरमध्येही पक्षाशी गद्दारी केली. जो आपल्या पक्षाचा, नेत्याचा होऊ शकत नाही,ते समाजाचे कधी होत नाहीत. त्यामुळे हडपसरचा स्वाभिमानी मतदार हा डाग पुसून काढण्यासाठी सज्ज झाला आहे.