देहूगाव – शहरात गेल्या सुमारे आठ महिन्यांपासून नवीन एलपीजी गॅस कनेक्शन मिळत नसल्याने नागरिकांची मोठी गैरसोय होत आहे. सध्या परिसरातील दीड हजारांहून अधिक नागरिक नवीन गॅस कनेक्शनच्या प्रतीक्षेत असल्याची माहिती मिळत आहे.

नवीन जोडण्या मिळत नसल्याने गॅस सिलिंडरच्या उपलब्धतेचा प्रश्न निर्माण झाला आहे. काही ठिकाणी सिलिंडरची जास्त दराने विक्री आणि काळाबाजार होत असल्याच्या तक्रारीही नागरिक करीत आहेत.

आंतरराष्ट्रीय स्तरावर अमेरिका, इस्रायल आणि इराण यांच्यातील युद्धजन्य परिस्थितीमुळे इंधन पुरवठ्यावर परिणाम होत असल्याची चर्चा आहे. या पार्श्वभूमीवर गॅस कंपन्यांनी नवीन ग्राहकांना कनेक्शन देण्याची प्रक्रिया थांबविल्याचे सांगण्यात येत आहे.

नवीन गॅस कनेक्शनसाठी संबंधित एजन्सीकडे दररोज ५० हून अधिक नागरिक चौकशी करत असल्याचे सध्या दिसून येत आहे. मात्र, गॅस कंपन्यांकडून नवीन जोडण्या देण्यास स्थगिती असल्याने एजन्सींनाही ग्राहकांना कनेक्शन देता येत नसल्याचे सांगण्यात येत आहे.

परिणामी, नव्या घरात राहायला गेलेले नागरिक, भाडेकरू आणि अद्याप गॅस कनेक्शन नसलेल्या कुटुंबांना मोठ्या अडचणींचा सामना करावा लागत आहे. दरम्यान, गॅस सिलिंडरचा काळाबाजार रोखण्यासाठी संबंधित यंत्रणांनी नियमित तपासणी करावी. त्यासोबतच जास्त दराने सिलिंडरची विक्री करणाऱ्यांवर कठोर कारवाई करावी, अशी मागणी नागरिकांकडून होत आहे.

घरगुती गॅस ही प्रत्येक कुटुंबाची मूलभूत गरज आहे. त्यामुळे नवीन कनेक्शन देण्याची प्रक्रिया तातडीने सुरू करावी. तसेच प्रतीक्षेत असलेल्या नागरिकांना दिलासा देण्यासाठी शासन आणि गॅस कंपन्यांनी योग्य निर्णय घ्यावा, अशी मागणी देहू परिसरातील नागरिकांनी केली आहे.

ग्राहकांवर अतिरिक्त आर्थिक भार
१० किलोच्या नवीन गॅस सिलिंडरसाठी ग्राहकांना सुमारे १,६५० रुपये मोजावे लागत आहेत. तर दुसरीकडे, १४.२ किलोच्या नियमित घरगुती सिलिंडरची किंमत सुमारे ९५५ रुपये आहे. म्हणजेच ४.२ किलो गॅस कमी मिळत असतानाही १० किलोच्या सिलिंडरसाठी सुमारे ६९५ रुपये अधिक द्यावे लागत आहेत. त्यामुळे नवीन कनेक्शनचा खर्च सर्वसामान्य ग्राहकांना परवडणारा नसल्याची भावना व्यक्त होत आहे.

नवीन कनेक्शनसाठी नागरिकांची प्रतीक्षा
गेल्या आठ महिन्यांपासून नवीन गॅस कनेक्शन मिळत नसल्याने नागरिकांना पर्यायी व्यवस्था करावी लागत आहे. काही नागरिकांना हॉटेलमधून जेवण आणावे लागत आहे, तर काहींनी इलेक्ट्रिक शेगडीचा पर्याय स्वीकारला आहे. मात्र, यामुळे घरखर्चात वाढ होत असून आर्थिक गणितही कोलमडत आहे.

विशेषतः नव्याने संसार सुरू केलेली कुटुंबे आणि भाड्याच्या घरात राहणाऱ्या नागरिकांची अधिकच कोंडी होत आहे. गॅस कनेक्शनसाठी अर्ज करूनही प्रतीक्षा करावी लागत असल्याने नागरिकांमध्ये नाराजी वाढत आहे.

Pune District : क्रशरला ६६ लाखांचा दंड; शेतकऱ्यांच्या नुकसानभरपाईचे काय