Wai: वाई शहरातून निघालेली मिरवणूक, शाही स्नान व सायंकाळी सात वाजता झालेल्या भव्य महाआरतीने येथे पाच दिवस चाललेल्या लघु कुंभ मेळ्याची सांगता झाली. सोमवारी सकाळी दहा वाजता महागणपतीची आरती करून साधूंना रथात, घोड्यावर बसवून संपूर्ण शहरातून वाजत- गाजत भव्य मिरवणूक काढण्यात आली.

‘दक्षिण काशी’ अशी अध्यात्मिक ओळख असलेल्या वाईत कृष्णा नदीच्या तीरावर गेले पाच दिवस अतिशय शिस्तबध्द पद्धतीने लघु कुंभ मेळ्याचे आयोजन झाले. यामध्ये कृष्णामाईची दररोज होणारी महाआरती कुंभ मेळ्याचे आकर्षण ठरली. लाखो भाविकांनी सायंकाळी सात वाजता गणपती घाटावर प्रचंड गर्दी करून आरतीचा आनंद लुटला. अनेक दिग्गजांनी या कुंभ मेळ्यास हजेरी लावून आपला या कार्यास पाठिंबा व्यक्त केला. विविध कार्यक्रमांमध्ये सहभाग घेऊन राजकीय व्यक्तींनीही कुंभ मेळ्याचा आनंद घेतला.

यामध्ये ग्रामविकास मंत्री जयकुमार गोरे, जिल्हा परिषदेच्या अध्यक्षा डॉ. प्रियाताई शिंदे, भाजपचे माजी जिल्हाध्यक्ष धैर्यशील कदम, शिक्षण मंत्री पंकज भोईर, जैन समाज, विविध संघटनाचे पदाधिकाऱ्यांनी उपस्थिती दर्शविल्याने मेळा यशस्वी ठरला. नगराध्यक्ष अनिल सावंत व त्यांच्या सहकाऱ्यांनी हा उपक्रम आखला. पाच दिवस चाललेल्या मेळ्यात देशातील नागा स्वामींसह अनेक राज्यांतील साधूंनी सहभाग घेतला.

मिरवणुकीचा शुभारंभ राज्याचे शिक्षण मंत्री पंकज भोईर यांच्या हस्ते झाला. गणपती घाटावरून मिरवणुकीस सुरुवात होवून गंगापुरीतील शाहीर चौकातून नगरपालिका, भाजी मंडई, जैन मंदिरमार्गे दातार दवाखाना, किसन वीर चौकातून पोलीस ठाण्यापासून छत्रपती शिवाजी महाराज चौकातून पुन्हा गणपती घाटावर मिरवणुकीची सांगता झाली. नंतर शाही स्नानाला सुरुवात करण्यात आली. धोम पाटबंधारे खात्याने कृष्णा नदीत पाणी न सोडल्याने सर्वच साधूंनी शाही स्नानात सहभाग घेतला नाही.

सायंकाळी सात वाजता सर्व वाईकरांनी हातात आरतीचे ताट घेऊन महाआरती करण्यात आली आणि लघु कुंभ मेळ्याचे सांगता करण्यात आली. पाच दिवसांत पाच ते सहा लाख भाविकांनी सांधू संतांचे दर्शन घेतले. कुंभमेळा यशस्वी करण्यासाठी नगराध्यक्ष अनिल सावंत, काशिनाथ शेलार, सचिन घाटगे, दीपक ननावरे, प्रदीप जायगुडे, गुजरातमधून आलेले योगेन्द्र्गिरी महाराज, जिल्हा परिषद माजी अध्यक्षा अरुणादेवी पिसाळ, घनशाम चक्के, विरोधी पक्ष नेते विजय ढेकाणे, मंदिर महासंघ तालुकाध्यक्ष श्रीधर भाडळकर, ॲड. दीप्ती पिसाळ, सौ. सरिता सावंत, जितेंद्र पिसाळ, सचिन सावंत, नीलेश मोरे, अजित घोडके, गजानन भोसले, सुशांत गोळे, सचिन मानकुंबरे, संदीप घोरपडे, राजेश गुरव, संगीता गुरव, प्रसाद चारेगावकर, प्रवीण जाधव यांसह सर्व नगरसेवक, नगरसेविका, पदाधिकारी, स्वयंसेवक, भाविक आणि वाईकर नागरिक यांनी विशेष परिश्रम घेतले.

भक्तीचैतन्याने उजळून गेला कृष्णाकाठ

दिव्यांच्या प्रकाशाने आणि भक्तीच्या चैतन्याने पाच दिवस कृष्णाकाठ उजळून निघाला होता. काशीच्या गंगेच्या काठी आल्याचा भास व्हावा असे कृष्णामाई महाआरतीचे दृश्य अतिशय विलोभनीय होते. या सोहळ्याचे औचित्य साधून वाई शहरासह संपूर्ण तालुक्यातून भाविकांचा जनसागर कृष्णाकाठावर लोटला होता. महाआरती झाल्यानंतर कुंभमेळ्यासाठी देशभरातून आलेल्या महंत, साधू, संत आणि नागा संन्यासी यांचे दर्शन घेण्यासाठी भाविकांची प्रचंड गर्दी झाली होती. एवढ्या मोठ्या प्रमाणावर होणारी गर्दी लक्षात घेऊन लघु कुंभमेळा सेवा समिती आणि पोलीस प्रशासनाच्यावतीने चोख नियोजन व कडक पोलीस बंदोबस्त ठेवला होता. कोणताही अनुचित प्रकार न घडता हा सोहळा अत्यंत शिस्तीत आणि उत्साहात पार पडला.