Wadgaon Maval – आमदार सुनिल शेळके यांच्या मार्गदर्शनाखाली आणि नगराध्यक्षा अबोली मयूर ढोरे यांच्या अध्यक्षतेखाली वडगाव नगरपंचायतीची प्रशासकीय आढावा बैठक शुक्रवारी (दि. २०) पार पडली. शहराच्या सर्वांगीण विकासासाठी ही बैठक आयोजित करण्यात आली होती. या बैठकीस आमदार, नगराध्यक्षा, मुख्याधिकारी, सर्व नगरसेवक-नगरसेविका तसेच प्रशासकीय अधिकारी उपस्थित होते. बैठकीत शहरातील नागरी सुविधा अधिक सक्षम करण्याबाबत चर्चा करण्यात आली. तसेच सुरू असलेल्या विकासकामांचा सविस्तर आढावा घेण्यात आला. शहरातील ४० कोटी रुपयांच्या पाणीपुरवठा योजनेचे काम सुमारे ६० टक्के पूर्ण झाले असून कामाबाबत समाधान व्यक्त करण्यात आले. ही योजना वेळेत आणि दर्जेदार पद्धतीने पूर्ण करावी तसेच स्वच्छता व इतर विकासकामांच्या गुणवत्तेबाबत कोणतीही तडजोड करू नये, अशा सूचना संबंधित अधिकारी आणि ठेकेदारांना देण्यात आल्या. बाजारपेठेतील मुख्य रस्ता रुंदीकरण न करण्याबाबत, जैन मंदिर आरक्षणाचा प्रश्न, महिला सक्षमीकरणासाठी निधी, दत्त मंदिर परिसरातील अभ्यासिका, नमो उद्यानांतर्गत ओपन स्पेस व उद्याने सुशोभीकरण, वैकुंठरथ, बसस्टॉप दुरुस्ती, ओपन जिम, भाजी मंडई, सीसीटीव्ही आदी कामे मार्गी लावण्याच्या सूचना देण्यात आल्या. वाहतूक कोंडी, कचरा व्यवस्थापन, पार्किंग, अतिक्रमण, कातवी स्मशानभूमी प्रश्न तसेच हॉकर्स झोन, प्रमुख चौकांचे सुशोभीकरण, क्रीडांगण, अद्ययावत गार्डन व ज्येष्ठांसाठी नाना-नानी पार्क याबाबत तातडीने उपाययोजना करण्याचे निर्देश देण्यात आले. यावेळी बैठकीस आमदार सुनिल शेळके, नगराध्यक्षा अबोली ढोरे, मुख्याधिकारी डॉ. प्रविण निकम यांच्यासह सर्व नगरसेवक, नगरसेविका व अधिकारी उपस्थित होते.
