Mumbai Politics : मुंबईच्या राजकारणाचा केंद्रबिंदू आणि शिवसेनेचा बालेकिल्ला (Mumbai Politics) मानल्या जाणाऱ्या दादरमध्ये राजकीय भूकंप झाला आहे. अवघ्या १९७ मतांच्या अटीतटीच्या फरकाने विजय मिळवून ज्या प्रभागाने उद्धव ठाकरेंच्या शिवसेनेला नवसंजीवनी दिली होती, त्याच प्रभागातील निकालाला आता अनपेक्षित कलाटणी मिळाली आहे.

ठाकरेसेनेच्या दिग्गज नेत्या आणि नगरसेविका विशाखा राऊत यांचे नगरसेवक पद अखेर रद्द करण्यात आले असून, आगामी सहा वर्षांसाठी (Mumbai Politics) त्यांच्यावर निवडणूक लढवण्यास बंदी घालण्यात आली आहे.

सेनाभवन, ऐतिहासिक शिवाजी पार्क आणि सिद्धिविनायक मंदिराचा परिसर व्यापणारा प्रभाग क्रमांक १९१ हा शिवसेनेच्या अस्मितेचा गाभा मानला जातो. शिवसेनेतील ऐतिहासिक फुटीनंतर या बालेकिल्ल्यात आपला झेंडा कोणाचा फडकणार, याकडे संपूर्ण महाराष्ट्राचे लक्ष लागले होते.

ठाकरे गटाकडून मैदानात उतरलेल्या अनुभवी विशाखा राऊत आणि शिंदे गटाकडून शड्डू ठोकणाऱ्या माजी आमदार सदा सरवणकर यांच्या कन्या प्रिया सरवणकर यांच्यात ही अटीतटीची लढत रंगली होती.

या चुरशीच्या लढतीत विशाखा राऊत यांनी १३,२३६ मते मिळवत प्रिया सरवणकर (१३,०३९ मते) यांचा केवळ १९७ मतांनी पराभव केला आणि ठाकरे गटाने आपला गड राखल्याचा मोठा राजकीय संदेश दिला. मात्र, हा राजकीय विजय अल्पजीवी ठरला.

प्रभाग क्रमांक १९१ हा मागास प्रवर्ग (महिला) राखीव असल्याने विशाखा राऊत यांनी निवडणूक अर्जासोबत सादर केलेल्या जात वैधता प्रमाणपत्रावर प्रिया सरवणकर यांनी थेट जिल्हा जात प्रमाणपत्र पडताळणी समितीकडे आक्षेप नोंदवला होता. ही कायदेशीर लढाई अखेर राऊत यांच्या अंगाशी आली.

पडताळणी समितीच्या निर्णयानंतर महापालिका (Mumbai Politics) आयुक्त अश्विनी भिडे यांनी नगरविकास विभागाला औपचारिक पत्र पाठवून विशाखा राऊत यांचे नगरसेवक पद रद्द करत असल्याचे कळवले आहे. तसेच त्या पुढील सहा वर्षे नगरसेवकपदाच्या निवडणुकीसाठी अपात्र ठरल्याचेही या पत्रात स्पष्ट करण्यात आले आहे. महापालिका सभागृहात लवकरच याबाबतची अधिकृत घोषणा होणार असून, या निकालाने ठाकरे सेनेला त्यांच्याच बालेकिल्ल्यात प्रचंड मोठा धक्का दिला आहे.