Khamenei Death : मध्यपूर्वेत सुरू झालेल्या नव्या संघर्षानंतर जगभरात इराणकडे लक्ष वेधले गेले आहे. इस्त्रायलने अमेरिकेच्या मदतीने इराणवर हवाई हल्ले केल्याची माहिती समोर आल्यानंतर परिस्थिती अधिक तणावपूर्ण झाली.

या हल्ल्यात इराणचे सर्वोच्च नेते अयातुल्ला अली खामेनेई यांचा मृत्यू झाल्याच्या वृत्तांनंतर सोशल मीडियावर अनेक फोटो आणि व्हिडिओ मोठ्या प्रमाणात व्हायरल होत आहेत. विशेषतः इराणी महिलांचे काही फोटो चर्चेचा विषय ठरले आहेत. मात्र या छायाचित्रांची पार्श्वभूमी आणि सत्य समजून घेणे महत्त्वाचे ठरत आहे.

व्हायरल फोटोमध्ये नेमकं काय दिसतं?

सोशल मीडियावर फिरत असलेल्या एका छायाचित्रात एक तरुणी खामेनेई यांचा फोटो जाळताना आणि त्याच आगीतून सिगारेट पेटवताना दिसते. दुसऱ्या काही छायाचित्रांमध्ये महिलांचा समूह एकत्र येऊन ‘चीयर्स’ करत उत्सव साजरा करत असल्याचा दावा केला जात आहे.

हे फोटो पाहून अनेकांनी असा निष्कर्ष काढला की खामेनेई यांच्या मृत्यूनंतर इराणमध्ये महिलांनी आनंद साजरा केला. मात्र वस्तुस्थिती थोडी वेगळी असल्याचे समोर येत आहे.

पहिला फोटो प्रत्यक्षात कधीचा?

तपासणीत असे दिसून आले की हा फोटो अलीकडचा नसून इराणमध्ये महिलांच्या हक्कांसाठी झालेल्या आंदोलनांच्या काळातील आहे. कठोर हिजाब नियम, सामाजिक निर्बंध आणि नैतिक पोलिसिंगविरोधात महिलांनी मोठ्या प्रमाणात आंदोलन छेडले होते.

त्या आंदोलनांदरम्यान सत्तेविरोधातील प्रतीकात्मक निषेध म्हणून काही महिलांनी शासनाच्या धोरणांविरोधात सार्वजनिकरित्या रोष व्यक्त केला होता. खामेनेई यांचा फोटो जाळण्याची घटना त्या आंदोलनाचे प्रतीक मानली गेली होती.

उत्सव साजरा करणाऱ्या महिलांचे फोटो — सत्य काय?

दुसऱ्या व्हायरल छायाचित्रांमध्ये महिलांना वाईनचे ग्लास हातात घेऊन उत्सव करताना दाखवले आहे. सोशल मीडियावर हे फोटो खामेनेई यांच्या मृत्यूनंतरचे असल्याचा दावा केला जात असला, तरी त्यांची वेळ आणि ठिकाण याबाबत अधिकृत पुष्टी उपलब्ध नाही.

Cheers to mooshali’s pathetic death 🥂
As the president Trump said “He died like a rat 🐀” pic.twitter.com/LeV6mdX581

— Morticia Addams 🇮🇷 (@melianouss) March 1, 2026

तज्ज्ञांच्या मते, संघर्षाच्या काळात जुने फोटो नव्या घटनांशी जोडून व्हायरल होण्याच्या घटना वारंवार घडतात. त्यामुळे अशा दृश्यांकडे सावधपणे पाहण्याची गरज आहे.

इराणमध्ये महिलांचा संघर्ष जागतिक मुद्दा का ठरला?

गेल्या काही वर्षांत इराणमध्ये महिलांच्या स्वातंत्र्याचा प्रश्न आंतरराष्ट्रीय चर्चेचा केंद्रबिंदू बनला आहे. ड्रेस कोड, सार्वजनिक जीवनातील निर्बंध आणि नैतिक पोलिसिंगविरोधात सातत्याने आंदोलन झाले.

विशेषतः महसा अमिनी यांच्या मृत्यूनंतर देशभरात तीव्र आंदोलन उसळले आणि महिलांच्या हक्कांचा प्रश्न जागतिक स्तरावर चर्चेत आला. अनेक आंदोलने कठोरपणे दडपण्यात आली, तरी विरोधाचा आवाज पूर्णपणे थांबला नाही.

दरम्यान, सोशल मीडियावर व्हायरल होत असलेले फोटो हे सध्याच्या घटनांशी थेट संबंधित असल्याचे ठोस पुरावे नाहीत. काही चित्रे जुन्या आंदोलनांची असून ती नव्या घटनांशी जोडून शेअर केली जात आहेत. त्यामुळे अशा संवेदनशील आंतरराष्ट्रीय घडामोडींमध्ये माहितीची पडताळणी करूनच निष्कर्ष काढणे आवश्यक आहे.