ढाका – शेजारील बांगलादेशात पुन्हा एकदा हिंसक निदर्शने सुरू झाली आहेत. यावेळी आंदोलक अध्यक्ष मोहम्मद शहाबुद्दीन यांना हटवण्याची मागणी करत आहेत. दरम्यान, मंगळवारी रात्री उशिरा आंदोलकांनी राष्ट्रपती भवनाला घेराव घातला. राजधानी ढाक्यातील राष्ट्रपतींचे निवासस्थान असलेल्या बंगभवनबाहेरची परिस्थिती अशी बनली की लष्कराला जबाबदारी नियंत्रण हाती घ्यावे लागले.

राष्ट्रपतींच्या राजीनाम्याच्या मागणीसाठी आंदोलकांनी बंग भवनाबाहेर ठिय्या मांडला आणि घोषणाबाजी सुरू केली तेव्हा लष्कराने बॅरिकेड्स लावून त्यांना रोखले. तत्पूर्वी आंदोलकांनी पोलिसांचे बॅरिकेड्स हटवण्याचा प्रयत्न केला, त्यानंतर पोलिसांना लाठीचार्ज करावा लागला. आंदोलनासाठी जमलेले लोक संतप्त झाल्याने पोलिसांनी अश्रुधुराच्या नळकांड्या फोडल्या.

याआधी आंदोलक आणि पोलिसांमध्ये चर्चा झाली, पण तोडगा निघाला नसल्याचे सांगण्यात येत आहे. बांगलादेशी मीडिया रिपोर्टनुसार, पोलिसांनी केलेल्या लाठीचार्जमध्ये अनेक आंदोलकही जखमी झाले असून, त्यांना उपचारासाठी रुग्णालयात दाखल करण्यात आले आहे. बांगलादेशातील शेख हसीना सरकारच्या विरोधात निदर्शने करणाऱ्या एका विद्यार्थी संघटनेने पदच्युत पंतप्रधानांच्या राजीनाम्यावर टिप्पणी केल्याबद्दल राष्ट्रपती मोहम्मद शहाबुद्दीन यांना हटवण्याची मागणी केली आहे.

गेल्या आठवड्यात एका बंगाली दैनिकाला दिलेल्या मुलाखतीत शहाबुद्दीन म्हणाले की, ऑगस्टमध्ये मोठ्या प्रमाणावर विद्यार्थ्यांच्या नेतृत्वाखाली झालेल्या निदर्शनांदरम्यान हसिना यांनी देश सोडण्यापूर्वी पंतप्रधानपदाचा राजीनामा दिल्याचा कोणताही कागदोपत्री पुरावा त्यांच्याकडे नाही. यानंतर शेख हसीना यांना सत्तेवरून हटविण्याचा प्रचार करणाऱ्या भेदभावविरोधी विद्यार्थी आंदोलनाने येथील मध्यवर्ती शहीद मिनारजवळ रॅली काढून शहाबुद्दीन यांच्या राजीनाम्याची मागणी केली.