Vinod Patil । देशातील लोकसभा निवडणुकीत मराठा समाज देखील उतरणार असल्याचे आता जवळपास निश्चित झालंय. त्यासाठी समाजाकडून उमेदवाराच्या नावाची चर्चा देखील पूर्ण झाली होती. मात्र या सगळ्या घडामोडीत आता राज्याच्या राजकारणात मोठा ट्विस्ट निर्माण करणारी बातमी समोर येतीय.

मराठा समन्वयक विनोद पाटील हे छत्रपती संभाजीनगर येथून उमेदवारी लढवण्यास इच्छूक आहेत. विनोद पाटील यांनी याआधीच लोकसभा निवडणूक लढवण्याची इच्छा व्यक्त केली आहे. त्यानंतर छत्रपती संभाजीनगरमध्ये काल  मनोज जरांगे पाटील यांच्या सूचनेनुसार मराठा समाजाच्या कार्यकर्त्यांची बैठक पार पडली. पण या बैठकीत मोठा गोंधळ झाला. या गोंधळानंतर आता विनोद पाटील थेट मुंबईत दाखल झाले आहेत.

विनोद पाटील मुख्यमंत्र्यांच्या भेटीला Vinod Patil ।

प्राप्त माहितीनुसार  विनोद पाटील हे मुख्यमंत्री एकनाथ शिंदे यांच्या भेटीसाठी त्यांच्या ‘वर्षा’ या शासकीय निवासस्थानी पोहोचले आहेत. विनोद पाटील छत्रपती संभाजीनगरमधून लढण्यास इच्छुक आहेत. त्यामुळे शिवसेना शिंदे गटाकडून विनोद पाटील यांना उमेदवारीची संधी मिळते का? ते पाहणं आता महत्त्वाचे ठरणार आहे.

या सर्व चर्चा होत असल्या तरी तिकडे उपमुख्यमंत्री देवेंद्र फडणवीस यांच्या ‘सागर’ बंगल्यावर भाजप नेते भागवत कराड, अतुल सावे, भाजपचे अनेक पदाधिकारी यांनी छत्रपती संभाजीनगरसाठी आग्रही मागणी केली. विशेष म्हणजे छत्रपती संभाजीनगरची जागा भाजपला सुटणार असल्याची देखील माहिती समोर येतीय. त्यामुळे आता विनोद पाटील यांना छत्रपती संभाजीनगरमधून जागा मिळते का? याकडे सर्वांचे लक्ष लागलंय.

विनोद पाटील कोण आहेत? Vinod Patil ।
विनोद पाटील हे मराठा क्रांती मोर्चाचे समन्वयक आहेत. मराठा आरक्षणासाठी त्यांनी न्यायालयात याचिका दाखल केली आहे. तसेच, आर.आर.पाटील फाऊंडेशन आणि अजिंक्य देवगिरी प्रतिष्ठान या दोन्ही संस्थाचे ते अध्यक्ष आहेत.