Vijay Rashmika: दाक्षिणात्य चित्रपटसृष्टीतील लोकप्रिय जोडी विजय देवरकोंडा आणि रश्मिका मंदाना यांच्या लग्नाच्या प्री-वेडिंग कार्यक्रमांना उत्साहात सुरुवात झाली आहे. सोशल मीडियावर समोर आलेल्या फोटोंमधून या सोहळ्याची झलक पाहायला मिळत आहे. पूल पार्टी, व्हॉलीबॉल मॅच आणि रोमँटिक कॅंडललाइट डिनर अशा विविध कार्यक्रमांनी लग्नाची रंगत वाढली आहे.

विजय देवरकोंडा आणि रश्मिका मंदाना यांनी त्यांच्या इन्स्टाग्राम स्टोरीजवर काही खास क्षण शेअर केले आहेत. मित्र-मैत्रिणींसोबत मजा, खेळ आणि आनंदात हे प्री-वेडिंग फंक्शन साजरे होत असल्याचे दिसत आहे.

रश्मिकाने शेअर केलेल्या एका फोटोमध्ये सुंदर सजवलेला कॅंडललाइट डिनर सेटअप पाहायला मिळतो. सोनेरी प्रकाशात न्हालेलं टेबल, गुलाबी लिली आणि हिरव्या हायड्रेंजिया फुलांची सजावट, ताजे हिरवे सफरचंद आणि लटकते द्राक्ष यामुळे संपूर्ण वातावरण अत्यंत आलिशान दिसत होते. टेबलावर खास प्रिंटेड मेन्यू कार्ड ठेवण्यात आले होते. पाहुण्यांसाठी विशेष जपानी पदार्थांची मेजवानी ठेवण्यात आल्याची माहिती यावरून मिळते. विशेष म्हणजे हिरव्या रंगाच्या नॅपकिनवर ‘विरोश’ असे नाव लिहिलेले दिसत होते, ज्याने चाहत्यांचे लक्ष वेधून घेतले.

विजयनेही आपल्या इन्स्टाग्रामवर पूल वॉलीबॉल खेळतानाचे फोटो शेअर केले. एका फोटोमध्ये व्हॉलीबॉल नेटच्या मागे खेळाडूंची सावली आणि हवेत उडणारा चेंडू दिसत होता. या फोटोंवरून लग्नसोहळ्यातील मस्ती आणि उत्साह स्पष्ट जाणवत आहे. पूलमध्ये तरंगणारा ड्रिंक स्टेशनही पाहायला मिळाला. लाल कपांनी सजवलेला हा भाग पार्टीचा मुख्य आकर्षण ठरला.

या सगळ्या कार्यक्रमांमधून हे स्पष्ट होते की विजय आणि रश्मिका आपला लग्नसोहळा खास आणि भव्य करण्याचा पूर्ण प्रयत्न करत आहेत. चाहत्यांमध्येही या लग्नाबद्दल प्रचंड उत्सुकता आहे. सोशल मीडियावर त्यांच्या फोटोंना मोठ्या प्रमाणात प्रतिसाद मिळत आहे.

अधिकृतरीत्या लग्नाची तारीख जाहीर करण्यात आलेली नसली तरी सोशल मीडियावर व्हायरल झालेल्या आमंत्रणपत्रिकेनुसार 26 फेब्रुवारी रोजी लग्न होणार असल्याची चर्चा आहे. तसेच 4 मार्च रोजी हैदराबादमध्ये रिसेप्शनचे आयोजन करण्यात येणार असल्याची माहिती समोर आली आहे.

सध्या तरी प्री-वेडिंग फंक्शनमधील फोटो पाहून चाहत्यांची उत्सुकता आणखी वाढली आहे. आता सर्वांना लग्नाच्या मुख्य सोहळ्याच्या आणि नव्या फोटोंच्या अपडेटची प्रतीक्षा आहे.