Vidhan Parishad Election : कर्नाटक विधानसभेच्या माध्यमातून विधान परिषदेच्या ७ जागांसाठी झालेल्या निवडणुकीत सत्ताधारी काँग्रेसने नेत्रदीपक कामगिरी करत ५ जागांवर विजय मिळवला आहे. या निवडणुकीत भाजप-जेडीएस या विरोधी आघाडीला मोठा धक्का बसला असून, त्यांच्याच आमदारांनी काँग्रेसच्या बाजूने ‘क्रॉस व्होटिंग’ केल्याचे स्पष्ट झाले आहे. विरोधी गोटातून काँग्रेस उमेदवारांना चक्क ११ अतिरिक्त मते मिळाल्याने राजकीय वर्तुळात खळबळ उडाली आहे.

संख्याबळाचे गणित आणि मिळालेली मते:

विधानसभेतील संख्याबळानुसार काँग्रेसच्या सर्व उमेदवारांना मिळून एकूण १४० मते मिळणे अपेक्षित होते. मात्र, प्रत्यक्षात काँग्रेसला १५१ मते मिळाली. याउलट, भाजपच्या दोन उमेदवारांना प्रत्येकी ३० मते वाटप करण्यात आली होती, मात्र त्यांना केवळ ५६ मतेच मिळाली. जेडीएसच्या उमेदवाराला स्वतःचे १८ आणि भाजपचे ४ अशी २२ मते मिळणे अपेक्षित असताना, त्यांचे उमेदवार गोविंद राजू यांना केवळ १४ मतांवर समाधान मानावे लागले.

हेही वाचा –  शिवसेना ठाकरे गटाच्या 6 बंडखोर खासदारांबाबत राज्य सरकारचा मोठा निर्णय 

सध्या २२४ सदस्यांच्या कर्नाटक विधानसभेत एका आमदाराचे निधन आणि एका आमदाराची पात्रता रद्द झाल्यामुळे सध्याची सदस्यसंख्या २२२ आहे. त्यामुळे विजयासाठी प्रत्येक उमेदवाराला २८ मतांच्या कोट्याची आवश्यकता होती. काँग्रेसकडे स्वतःचे १३५ आमदार, ३ अपक्ष आणि भाजपमधून हद्दपार झालेल्या २ आमदारांचा पाठिंबा होता. शेवटच्या क्षणी अतिरिक्त मते वाया जाऊ नयेत म्हणून काँग्रेसने पाचवा उमेदवार रिंगणात उतरवला आणि तो डाव यशस्वी ठरला.

काँग्रेस उमेदवारांना मिळालेली मते:

बी. के. हरिप्रसाद: ३० मते

टिपण्णा कुमकानूर: ३० मते

शिवन्ना मालवल्ली: ३० मते

पी. व्ही. मोहन: २९ मते

विनय कार्तिक (पाचवे उमेदवार): ३२ मते

‘क्रॉस व्होटिंग’ झाल्याची विरोधकांची कबुली:

विधानसभेतील विरोधी पक्षनेते आर. अशोक यांनी पत्रकार परिषदेत पराभव आणि क्रॉस व्होटिंग झाल्याचे मान्य केले. “आमच्या बाजूने क्रॉस व्होटिंग झाले आहे, हे सत्य आहे. पक्षादेश धुडकावून कोणी गद्दारी केली, याचा आम्ही शोध घेऊ,” असे अशोक म्हणाले. भाजपचे उमेदवार रघु कौटिल्य यांना ३१ मते दिली होती, त्यातील १ मत अवैध ठरले आणि त्यांना २७ मते मिळाली. तर दुसरे उमेदवार लिंगराज पाटील यांना २९ मते मिळाली.

जनतेचा आमच्यावर विश्वास: डी. के. शिवकुमार –

या अनपेक्षित यशावर प्रतिक्रिया देताना कर्नाटकचे मुख्यमंत्री डी. के. शिवकुमार म्हणाले, “आम्हाला मिळालेला हा विजय म्हणजे आम्ही राज्य योग्य दिशेने नेत असल्याचा जनतेचा आणि लोकप्रतिनिधींचा विश्वास आहे. ५ जागा जिंकू असा आम्हाला ठाम विश्वास होता, म्हणूनच आम्ही पाचवा उमेदवार उतरवला होता.”

दरम्यान, निवडून आलेले नेते बी. के. हरिप्रसाद यांनी, “आम्ही कोणाकडेही मते मागितली नव्हती. ज्या आमदारांनी आपल्या सदसद्विवेकबुद्धीला (अंतरात्मा) स्मरून काँग्रेसला मतदान केले, त्यांचे आम्ही आभार मानतो,” असे सांगत भाजप-जेडीएसमधील नाराजीवर बोट ठेवले. या क्रॉस व्होटिंगमध्ये भाजपचे आमदार जास्त फुटले की जेडीएसचे, याबाबत अद्याप संभ्रम असून, जेडीएस नेते आणि केंद्रीय मंत्री एच. डी. कुमारस्वामी उद्या (शुक्रवारी) पत्रकार परिषद घेऊन आपली भूमिका मांडणार आहेत.