PM Modi | Anurag Thakur | Congress – पंतप्रधान नरेंद्र मोदी यांनी भाजपचे खासदार अनुराग ठाकूर यांचे भाषण सोशल मीडियावरून शेअर केले. त्यावर कॉंग्रेसने तीव्र आक्षेप घेतला आहे. तसेच, मोदींविरोधात हक्कभंग ठराव आणण्याची तयारी सुरू केली आहे. त्यासाठी कॉंग्रेसचे खासदार चरणजितसिंग चन्नी यांनी नोटीस सादर केली आहे. लोकसभेतील केंद्रीय अर्थसंकल्पावरील चर्चेत मंगळवारी ठाकूर सहभागी झाले. त्यावेळी त्यांनी विरोधी पक्षनेते राहुल गांधी यांच्या जातीविषयी प्रश्नचिन्ह उपस्थित केले. ते वक्तव्य कामकाजातून वगळण्यात आले. तसे असले तरी ठाकूर यांच्या वक्तव्यावरून राजकीय गदारोळाला तोंड फुटले आहे. अनुराग ठाकूर यांचे ते भाषण मोदींनी शेअर केल्यानंतर कॉंग्रेसने आणखीच आक्रमक पवित्रा स्वीकारला. वगळण्यात आलेल्या वक्तव्याचाही समावेश असणारे ठाकूर यांचे संपूर्ण भाषण मोदींनी शेअर करण्याची कृती धक्कादायक आहे. ती कृती संसदीय विशेषाधिकारांच्या भंगाला प्रोत्साहन देणारी असल्याची प्रतिक्रिया कॉंग्रेसच्या गोटातून देण्यात आली. त्यापाठोपाठ चन्नी यांनी लोकसभेचे सभापती ओम बिर्ला यांच्याकडे हक्कभंग ठराव मांडण्यासाठीची नोटीस सादर केली. लोकसभेच्या कामकाजातून वगळण्यात आलेले वक्तव्य शेअर करणे हक्कभंग असून सभागृहाचा अवमान आहे, असे त्या नोटिसीत नमूद करण्यात आले.
