श्री अंबाबाईसह शिव-शाहू-फुले-आंबेडकर यांचे घेतले दर्शन…

कोल्हापूर (प्रतिनिधी) : करवीरचे आराध्य दैवत आई श्री अंबाबाईसह महाराष्ट्राला पुरोगामी विचारांचा वारसा देणाऱ्या शिव-फुले-शाहू-आंबेडकर यांचे भर पावसात दर्शन घेऊन कुलगुरू डॉ. देवानंद शिंदे यांनी आज शिवाजी विद्यापीठातील कारकीर्दीच्या अंतिम दिवसाच्या पूर्वसंध्येला करवीर नगरीचा भावनिक निरोप घेतला.

कोविड-१९च्या साथीमुळे श्री अंबाबाई मंदिर दर्शनासाठी बंद असल्यामुळे कुलगुरू डॉ. शिंदे यांनी आज महाद्वारात उभे राहून आई अंबाबाईचे मुखदर्शन घेतले. त्यानंतर छत्रपती शिवाजी चौकातील छत्रपती शिवाजी महाराज यांच्या पुतळ्यास पुष्प वाहून अभिवादन केले. बिंदू चौकामध्ये महात्मा जोतीराव फुले आणि डॉ. बाबासाहेब आंबेडकर यांच्या पुतळ्यांसह शहीद स्मृतीस्तंभास अभिवादन केले.

दसरा चौक येथे जाऊन राजर्षी छत्रपती शाहू महाराज यांच्या पुतळ्यासही त्यांनी पुष्प वाहून अभिवादन केले. स्वामी विवेकानंद संस्थेच्या कार्यस्थळावरील डॉ. बापूजी साळुंखे आणि राजीव गांधी चौकातील लोकनेते बाळासाहेब देसाई आणि करवीर संस्थापक छत्रपती ताराराणी यांच्या पुतळ्यांचेही दर्शन घेऊन कुलगुरू डॉ. शिंदे यांनी अभिवादन केले. यावेळी प्राचार्य डॉ. डी.आर. मोरे त्यांच्यासमवेत होते.