Anna Hazare : ज्येष्ठ समाजसेवक अण्णा हजारे यांची प्रकृती अचानक बिघडल्याने त्यांना मुंबईतील प्रसिद्ध बॉम्बे हॉस्पिटलच्या अतिदक्षता विभागात (आयसीयू) दाखल करण्यात आल्याची माहिती समोर आली आहे. डॉक्टरांचे विशेष पथक त्यांच्या प्रकृतीवर बारकाईने लक्ष ठेवून असून, त्यांच्यावर तातडीने उपचार सुरू आहेत.

मिळालेल्या माहितीनुसार, अण्णा हजारे यांना डिहायड्रेशनचा गंभीर त्रास होत असून त्यांच्या शरीरातील पाण्याचे प्रमाण मोठ्या प्रमाणात कमी झाले आहे. त्यामुळे खबरदारीचा उपाय म्हणून त्यांना आयसीयूमध्ये दाखल करण्यात आले आहे. डॉक्टरांकडून विविध वैद्यकीय चाचण्या करण्यात येत असून, त्यांच्या अहवालानंतर पुढील उपचारांची दिशा निश्चित केली जाणार आहे.

गेल्या काही दिवसांपासून अण्णा हजारे यांची प्रकृती ठीक नसल्याची माहिती आहे. त्यांना प्रचंड खोकला, तीव्र ताप, अशक्तपणा तसेच शरीरातील पाण्याचे प्रमाण कमी होण्याचा त्रास होत होता. उपचारानंतरही प्रकृतीत अपेक्षित सुधारणा न झाल्याने डॉक्टरांनी त्यांना पुढील उपचारांसाठी तातडीने मुंबईला हलवण्याचा निर्णय घेतला.

यापूर्वी अहिल्यानगर जिल्ह्यातील त्यांच्या मूळ गावाजवळील राळेगणसिद्धी परिसरातील रुग्णालयात त्यांच्यावर उपचार सुरू होते. मात्र, प्रकृती अधिक खालावल्याने डॉक्टरांच्या विशेष पथकाच्या देखरेखीखाली त्यांना रुग्णवाहिकेद्वारे मुंबईत आणण्यात आले.

अण्णा हजारे मागील काही काळापासून प्रकृतीच्या कारणास्तव सार्वजनिक कार्यक्रमांमध्ये तुलनेने कमी सक्रिय दिसत आहेत. त्यांच्या प्रकृतीबाबतची बातमी समोर आल्यानंतर देशभरातील नागरिक आणि त्यांच्या समर्थकांकडून त्यांच्या लवकर प्रकृतीसुधारासाठी प्रार्थना केली जात आहे.