Actress Pass Away : १९७० आणि ८० च्या दशकात आपल्या अप्रतिम सौंदर्याने आणि सहज अभिनयाने रुपेरी पडदा गाजवणारी एक दिग्गज अभिनेत्री (Actress Pass Away) आता आपल्यात राहिलेली नाही. बंगाली आणि हिंदी सिनेसृष्टीतील ज्येष्ठ अभिनेत्री मिथू मुखर्जी यांनी वयाच्या ७१ व्या वर्षी जगाचा निरोप घेतला आहे. गेल्या वर्षभरापासून त्या कर्करोगासारख्या अत्यंत गंभीर आजाराशी एकाकी लढा देत होत्या.

अखेर मुंबईतील एका खासगी रुग्णालयात रविवारी रात्री त्यांची ही झुंज संपली (Actress Pass Away) आणि एका चतुरस्त्र अभिनय प्रवासावर कायमचा पडदा पडला. त्यांच्या निधनाची बातमी समोर येताच संपूर्ण भारतीय सिनेसृष्टीवर, विशेषतः बंगाली मनोरंजन विश्वावर दुःखाची गडद सावली पसरली आहे.

कोलकाता येथे १९५५ मध्ये जन्मलेल्या मिथू मुखर्जी यांनी वयाच्या अवघ्या १७ व्या वर्षी चित्रपट जगतात पाऊल ठेवले. चित्ता बोस यांच्या ‘शेष पर्व’ या चित्रपटातून अभिनयविश्वात पदार्पण करणाऱ्या या अभिनेत्रीला दिनेन गुप्ता यांच्या ‘मर्जिना अब्दुल्ला’ या सिनेमाने एका रात्रीत लोकप्रियतेच्या शिखरावर पोहोचवले. त्यानंतर उत्तम कुमार, सौमित्र चट्टोपाध्याय आणि रंजीत मल्लिक यांसारख्या त्या काळातील महानायकांसोबत त्यांनी स्क्रीन शेअर केली.

‘निशिकन्या’, ‘मौचाक’, ‘कबी’, ‘हॉटेल स्नो फॉक्स’, ‘प्रतिमा’, ‘बंधन’, ‘प्रार्थना’ आणि ‘स्वयंसिद्धा’ यांसारख्या एकापेक्षा एक सरस चित्रपटांमधून त्यांनी आपल्या अभिनयाची जादू दाखवून स्वतःची एक वेगळी ओळख निर्माण केली होती.

केवळ प्रादेशिक सिनेमांपुरते मर्यादित न राहता त्यांनी बॉलिवूडमध्येही आपल्या अभिनयाचा वेगळा ठसा उमटवला. १९७६ मध्ये दुलाल गुहा यांच्या ‘खान दोस्त’ चित्रपटातून त्यांनी हिंदीत पदार्पण केले. त्यानंतर प्रसिद्ध दिग्दर्शक बासू चटर्जी यांच्या ‘सफेद झूठ’, ‘दिललगी’ आणि ‘दो लड़के दोनों कड़के’ यांसारख्या लोकप्रिय चित्रपटांमध्ये त्यांनी संस्मरणीय भूमिका साकारल्या. त्यांच्या मनमोहक स्क्रीन (Actress Pass Away) प्रेझेन्सचे त्याकाळी मोठे कौतुक झाले होते.

यशाच्या शिखरावर असतानाच १९८० च्या दशकात त्यांनी सिनेसृष्टीपासून काही काळ अंतर राखले. त्यानंतर १९९० मध्ये ‘आश्रिता’ या चित्रपटातून त्यांनी पुनरागमन केले, पण दुर्दैवाने हाच चित्रपट त्यांच्या अभिनय कारकिर्दीतील अखेरचा ठरला.

या चित्रपटानंतर त्यांनी झगमगत्या दुनियेला कायमचा पूर्णविराम देत अत्यंत साधे आणि खासगी आयुष्य जगणे पसंत केले. वर्षभराच्या कर्करोगाशी दिलेल्या लढ्यानंतर त्यांच्या जाण्याने एका सुवर्णकाळाचा साक्षीदार हरपल्याची भावना व्यक्त होत आहे.