Venezuelan President Nicolas Maduro: व्हेनेझुएलामध्ये शनिवारी पहाटे अमेरिकेने केलेल्या एका भीषण लष्करी कारवाईत राष्ट्राध्यक्ष निकोलस मादुरो यांना अटक करण्यात आली आहे. अमेरिकेचे राष्ट्राध्यक्ष डोनाल्ड ट्रम्प यांनी स्वतः सोशल मीडियावर मादुरो यांच्या अटकेचे पहिले छायाचित्रे शेअर करत या मोहिमेची पुष्टी केली. मादुरो यांना सध्या एका अमेरिकन युद्धनौकेवरून अमेरिकेत नेले जात आहे. समोर आलेल्या पहिल्या छायाचित्रात निकोलस मादुरो अमेरिकन सैनिकांच्या कडेकोट बंदोबस्तात दिसत आहेत. एका युद्धनौकेच्या आत असलेल्या या छायाचित्रात मादुरो यांनी काळा चष्मा घातलेला असून त्यांच्या हातात पाण्याची बाटली दिसत आहे. ही कारवाई व्हेनेझुएलाची राजधानी काराकस येथील नागरी आणि लष्करी प्रतिष्ठानांवर झालेल्या हल्ल्यानंतर करण्यात आली. अमेरिकेच्या न्याय विभागाने मादुरो आणि त्यांच्या पत्नी सिलिया फ्लोरेस यांच्यावर गंभीर आरोप ठेवले आहेत. मादुरो हे एका भ्रष्ट आणि अवैध सरकारचे नेतृत्व करत असून, त्यांनी दशकांपासून अमली पदार्थांच्या तस्करीसाठी सरकारी यंत्रणेचा गैरवापर केल्याचा दावा अमेरिकेने केला आहे. ‘नार्को-टेररिझम’च्या माध्यमातून अमेरिकेत मोठ्या प्रमाणावर कोकेनची तस्करी केल्याचा ठपका त्यांच्यावर ठेवण्यात आला आहे. अमेरिकेच्या अटॉर्नी जनरल पाम बोंडी यांनी स्पष्ट केले की, मादुरो आणि त्यांच्या पत्नीला न्यूयॉर्कमधील न्यायालयात हजर केले जाईल. “या दांपत्याला लवकरच अमेरिकन भूमीवर न्यायाचा सामना करावा लागेल,” असे त्यांनी सांगितले. दरम्यान, व्हेनेझुएला सरकारने याला ‘साम्राज्यवादी हल्ला’ संबोधून जनतेला रस्त्यावर उतरण्याचे आवाहन केले आहे. मादुरो यांच्या अनुपस्थितीत आता उपराष्ट्राध्यक्ष डेल्सी रॉड्रिग्ज या सत्तेची सूत्रे हाती घेण्याची शक्यता आहे.
