Indapur :  (कळस) – वायाळवस्तीपाटी ते विठ्ठलवाडी (ता. इंदापूर) या सुमारे पाच किलोमीटर अंतराच्या रस्त्याच्या दुतर्फा काटेरी झाडे व झुडपे मोठ्या प्रमाणात वाढली आहेत. त्यामुळे या मार्गावरून प्रवास करणे दिवसेंदिवस अवघड होत असून नागरिकांसह शालेय विद्यार्थ्यांना त्रास सहन करावा लागत आहे.

हा रस्ता पुढे पुणे-सोलापूर राष्ट्रीय महामार्गाला जोडला जात असल्याने या मार्गावर नागरिक व विद्यार्थ्यांची सतत वर्दळ असते. रस्त्याच्या कडेला वाढलेल्या झाडाझुडपांमुळे विशेषतः रात्रीच्या वेळी रस्त्याचा अंदाज येत नसल्याने छोटे-मोठे अपघात घडत असल्याचे नागरिकांचे म्हणणे आहे.

त्यामुळे सार्वजनिक बांधकाम विभागाच्या अधिकाऱ्यांनी तातडीने लक्ष देऊन रस्त्याच्या दुतर्फा वाढलेली झाडे व झुडपे हटवावीत, अशी मागणी नागरिकांसह शालेय विद्यार्थ्यांकडून होत आहे.