मुंबई : जीएसटी नोंदणीसंबंधित गोपनीय माहितीवर विविध बँकांकडून डल्ला मारला जात आहे. याप्रकरणी उच्चस्तरीय समितीकडून चौकशी करून दोषींवर कठोर कारवाई करावी, अशी मागणी विधान परिषदेचे विरोधी पक्षनेते अंबादास दानवे यांनी केली आहे. अंबादास दानवे यांनी यासंदर्भात राज्याचे उपमुख्यमंत्री तथा अर्थमंत्री अजित पवार यांना पत्र लिहिले आहे. जीएसटी नोंदणीसंदर्भातील माहिती बाहेर लीक होत आहे. जीएसटीसाठी अर्ज केलेल्या अनेक व्यावसायिकांकडून जीएसटीसाठी अर्ज केल्यानंतर नोंदणी प्रमाणपत्र मिळते. त्यानंतर विविध बँकांकडून या कंपनीच्या नावाने खाते उघडण्यासाठी सतत फोन येण्यास सुरुवात होते. जीएसटी विभागाकडे करदात्यांनी दिलेली गोपनीय माहिती विविध बँकांपर्यंत कशी जाते. हा गंभीर प्रकार असून यात काही अधिकारी व कर्मचारी गुंतले आहेत. त्यांच्या मार्फतच तृतीय पक्षांना माहिती देण्यात येत आहे, असा आरोप देखील अंबादास दानवे यांनी केला आहे. तसेच वस्तू व सेवा कर अधिनियम व संबंधित नियमांनुसार करदात्याची माहिती अत्यंत गोपनीय असते. संबंधित माहिती कोणत्याही परिस्थितीत बाह्य घटकांसोबत सामायिक करणे, ही बाब कायद्याचे उल्लंघन करणारी असून अत्यंत गंभीर स्वरूपाची आहे. त्यामुळे शासन व कर प्रशासन यांच्याबाबत करदात्यांमध्ये अविश्वासाची भावना निर्माण झाली आहे. या प्रकरणाची उच्चस्तरीय समितीकडून चौकशी करून दोषींवर कठोर कारवाई करावी. तसेच भविष्यात असे प्रकार घडू नयेत म्हणून योग्य त्या प्रतिबंधात्मक उपाययोजना राबवाव्यात, असंही अंबादास दानवे यांनी या पत्रात म्हटले आहे.
