Vaibhav Sooryavanshi Record Most Sixes IPL Playoffs : आयपीएल २०२६ मधील सनरायझर्स हैदराबादविरुद्धच्या ‘एलिमिनेटर’ सामन्यात राजस्थान रॉयल्सच्या १५ वर्षांच्या वैभव सूर्यवंशीने अशी काही तुफानी फलंदाजी केली, जी क्रिकेटप्रेमी शतकानुशतके लक्षात ठेवतील. न्यू चंदीगडच्या मुल्लानपूर स्टेडियमवर वैभवने अवघ्या २९ चेंडूंत ९७ धावांची आतिशी खेळी खेळून हैदराबादच्या गोलंदाजांची अक्षरशः धूळधाण उडवली. या ऐतिहासिक डावात त्याने गुजरात टायटन्सचा कर्णधार शुबमन गिलचा एक फार मोठा विक्रम मोडीत काढला आहे.

शुबमन गिलचा ‘तो’ रेकॉर्ड मोडला!

वैभव सूर्यवंशीने हैदराबादविरुद्धच्या या बाद फेरीच्या सामन्यात एकूण १२ गगनचुंबी षटकार ठोकले. यासह तो आयपीएल प्ले-ऑफ किंवा नॉकआउटच्या इतिहासामध्ये एकाच डावात सर्वाधिक षटकार मारणारा जगातील नंबर १ फलंदाज बनला आहे. यापूर्वी हा विक्रम शुबमन गिलच्या नावावर होता. गिलने २०२३ च्या क्वालिफायर-२ मध्ये मुंबई इंडियन्सविरुद्ध १२९ धावांच्या खेळीत १० षटकार मारले होते. १५ वर्षांच्या वैभवने आता १२ षटकारांसह गिलला मागे टाकून नवा इतिहास रचला आहे.

आयपीएल प्ले-ऑफ/नॉकआउटच्या एका डावात सर्वाधिक षटकार:

• १२ षटकार: वैभव सूर्यवंशी विरुद्ध हैदराबाद (२०२६) *
• १० षटकार: शुभमन गिल विरुद्ध मुंबई इंडियन्स (२०२३)
• ९ षटकार: रजत पाटीदार विरुद्ध गुजरात टायटन्स (२०२६)

हेही वाचा – Vaibhav Sooryavanshi Records : वैभव सूर्यवंशीचा मुल्लानपूरमध्ये महासंग्राम! वॉर्नरचा १० तर जयसूर्याचा १८ वर्षांपूर्वीचा रेकॉर्ड एकाच डावात मोडले

थोडक्यात हुकला ख्रिस गेलचा सर्वात वेगवान शतकाचा विक्रम –

वैभव सूर्यवंशी आयपीएल इतिहासातील सर्वात वेगवान शतक बनवण्याच्या उंबरठ्यावर उभा होता. २९ व्या चेंडूवर त्याला शतकासाठी केवळ ३ धावा हव्या होत्या. जर त्याने इथे मोठा शॉट मारून शतक पूर्ण केले असते, तर ख्रिस गेलचा २०१३ मधील ३० चेंडूंतील शतकाचा जागतिक रेकॉर्ड मोडला असता. मात्र, मोठा शॉट मारण्याच्या नादात चेंडू बॅटची वरची कडा घेऊन थेट थर्ड मॅनच्या हातात गेला. ९७ धावांवर बाद झाल्यावर वैभव स्वतः अत्यंत निराश दिसला, कारण इतिहास रचण्याची सुवर्णसंधी त्याच्या अगदी जवळ येऊन हुकली होती. मात्र, शतक न होताही त्याची ही २९ चेंडूतील ९७ धावांची खेळी इतिहासाच्या पानात सुवर्णअक्षरांनी लिहिली गेली आहे.