Vaibhav Sooryavanshi : आपल्या तुफानी फलंदाजीने प्रतिस्पर्धी गोलंदाजांची झोप उडवणारा आणि विक्रमांचे इमले रचणारा भारताचा १५ वर्षीय युवा खेळाडू वैभव सूर्यवंशी (Vaibhav Sooryavanshi) एका वेगळ्याच कारणाने चर्चेत आला आहे. नेहमी चौकार-षटकारांचा पाऊस पाडणाऱ्या वैभवच्या बॅटला मैदानात अचानक ब्रेक लागला खरा, पण त्यानंतर जे घडलं त्याने क्रिकेटविश्वाला आश्चर्याचा मोठा धक्का दिला.

दुलीप ट्रॉफीच्या उपांत्यपूर्व फेरीत ईस्ट झोन आणि नॉर्थ ईस्ट झोन यांच्यात रंगलेल्या सामन्यात ईस्ट झोनने प्रथम फलंदाजीचा निर्णय घेतला. डावाची सुरुवात करण्यासाठी मैदानात उतरलेल्या वैभव सूर्यवंशीकडून (Vaibhav Sooryavanshi) चाहत्यांना मोठ्या खेळीची अपेक्षा होती. मात्र, केवळ ६ चेंडूंत २ चौकारांच्या मदतीने ८ धावा करत तो स्वस्तात माघारी परतला.

वैभव लवकर बाद झाला तरी ईस्ट झोनने सामन्यावरची पकड ढिली पडू दिली नाही. सुदीप कुमारच्या १४६ धावा आणि शाहबाज अहमदच्या तुफानी १६७ धावांच्या जोरावर ईस्ट झोनने ४६७ धावांचा डोंगर उभा केला.

प्रत्युत्तरात नॉर्थ ईस्ट झोनचा संघ पहिल्या डावात अवघ्या १११ धावांवर गारद झाला आणि त्यांच्यावर फॉलो-ऑनची नामुष्की ओढवली. दुसऱ्या डावातही विरोधी संघ संघर्ष करत असताना कर्णधार इशान किशनने एक धक्कादायक आणि धाडसी चाल खेळली.

त्याने चेंडू थेट वैभव सूर्यवंशीच्या (Vaibhav Sooryavanshi) हाती सोपवला. पार्ट-टाईम गोलंदाजीसाठी आलेल्या वैभवने चेंडू हातात घेताच खेळपट्टीवर असा काही जादुई स्पेल टाकला की सगळेच पाहत राहिले. वैभवने सलग चार चेंडूंच्या अंतरात किशन लिंगडोह आणि इमलीवती लेमटूर या दोन फलंदाजांना तंबूत धाडत सामन्यात खळबळ उडवून दिली. त्याने अवघ्या ३ षटकांत ११ धावा देत २ महत्त्वाचे बळी टिपले.

Vaibhav Sooryavanshi provides Double Delight ✌️

Picks up 2⃣ wickets in the over. 2 excellent catches as well. 🙌

North East Zone are 79/7 in the 2nd innings after following on.

Scorecard ▶️ https://t.co/XJFhfvvTIU#DuleepTrophy pic.twitter.com/NnYbBPnrja

— BCCI Domestic (@BCCIdomestic) August 25, 2026

बीसीसीआयनेही त्याच्या या सनसनाटी गोलंदाजीचा व्हिडिओ शेअर करत कौतुक केले आहे. या सामन्यात ईस्ट झोनचा विजय आणि उपांत्य फेरीतील प्रवेश जवळपास निश्चित मानला जात आहे. फलंदाजीत अपयश आले तरी गोलंदाजीत चमक दाखवणारा वैभव (Vaibhav Sooryavanshi) उपांत्य फेरीत आपल्या बॅटने कशी पुनरागमन करतो याकडे आता संपूर्ण क्रीडा जगताचे लक्ष लागले आहे.