Vaibhav Solankar : खासदार संजय राऊत यांच्या बारामती दौऱ्याच्या पार्श्वभूमीवर भारतीय जनता युवा मोर्चाचे पुणे ग्रामीण जिल्हाध्यक्ष वैभव सोलनकर (Vaibhav Solankar) यांना पोलिसांनी प्रतिबंधात्मक स्वरूपात ताब्यात घेतले.

संजय राऊत यांच्या बारामती तालुक्यातील मोरगाव येथील दौऱ्यादरम्यान कोणतीही अनुचित घटना घडू नये आणि कायदा-सुव्यवस्था अबाधित राहावी, यासाठी पोलिसांनी ही कारवाई केली.

संजय राऊत यांच्या वक्तव्यांचा निषेध करण्यासाठी भाजप युवा मोर्चाच्या (Vaibhav Solankar) वतीने काळे झेंडे दाखवण्याचे नियोजन करण्यात आले होते. तसेच, राऊत यांच्या वक्तृत्वशैलीचा निषेध करण्यासाठी प्रतीकात्मक स्वरूपात ‘फेविक्विक’ आणि ‘कुलूप’ भेट देण्याचा अनोखा निषेधात्मक उपक्रम करण्याची तयारी करण्यात आली होती. या पार्श्वभूमीवर पोलिसांनी वैभव सोलनकर यांच्यासह युवा मोर्चाच्या काही पदाधिकाऱ्यांना खबरदारीचा उपाय म्हणून ताब्यात घेतले.

यावेळी भाजप युवा मोर्चाच्या कार्यकर्त्यांनी “लोकशाहीमध्ये निषेध करण्याचा अधिकार अबाधित राहिला पाहिजे”, अशी भूमिका मांडली. तसेच, कोणताही अनुचित प्रकार न करता शांततामय आणि कायदेशीर मार्गाने निषेध व्यक्त करण्याचा निर्धार व्यक्त केला.

वैभव सोलनकर (Vaibhav Solankar) म्हणाले, “कायदा व सुव्यवस्था राखण्याची पोलिसांची जबाबदारी आम्ही समजतो आणि त्याचा आदर करतो. मात्र, लोकशाही व्यवस्थेत एखाद्या लोकप्रतिनिधीच्या वक्तव्याचा निषेध करण्याचा अधिकारही नागरिकांना आहे. आमचा निषेध हा शांततामय आणि कायदेशीर मार्गानेच असेल. पोलिसांनी आम्हाला ताब्यात घेतले असले, तरी आमचा लोकशाही मार्गाने आवाज उठवण्याचा निर्धार कायम आहे.”

संजय राऊत यांच्या बारामती दौऱ्याच्या पार्श्वभूमीवर पोलिसांनी घेतलेल्या या प्रतिबंधात्मक कारवाईमुळे भाजप युवा मोर्चाच्या कार्यकर्त्यांमध्ये तीव्र प्रतिक्रिया उमटली आहे.