प्रभात वृत्तसेवा
वडगाव मावळ – भाजपचे जिल्हाध्यक्ष प्रदीप कंद यांनी जिल्ह्यातील नगर परिषद, नगरपंचायत निवडणुकांसाठी प्रभारी पदांची नियुक्ती जाहीर केली. त्यामध्ये वडगाव नगरपंचायत निवडणुकीसाठी भारतीय जनता पक्षाने ज्येष्ठ नेते भास्करराव म्हाळसकर यांची प्रभारीपदी नियुक्ती करून नगरपंचायत निवडणुकीची जबाबदारी सोपवली आहे.वडगाव नगरपंचायतची स्थापना झाल्यानंतर पहिल्याच सार्वत्रिक निवडणुकीत भाजपचे आठ नगरसेवक निवडून आले होते.

त्‍यावेळी म्‍हाळसकर यांनी केलेले काम, भाजप, राष्ट्रवादीचा एक गट व मनसे अशी मोट बांधत सत्ता स्थापन करून भाजपच्या पहिल्या उपनगराध्यक्षा म्हणून अर्चना म्हाळसकर यांना संधी देण्यात भास्करराव म्हाळसकर यांचा विशेष सहभाग होता. याशिवाय म्हाळसकर यांनी पक्षातील विजय जाधव, शाम ढोरे, प्रसाद पिंगळे, भूषण मुथा, रविंद्र काकडे, श्रीधर चव्हाण, शंकर भोंडवे, रवींद्र म्हाळसकर या ८ जणांना स्वीकृत नगरसेवक पदाची संधी देऊन सर्वसामान्य कार्यकर्त्यांनाही न्याय दिला.

सन २०१२ मध्ये भास्करराव म्हाळसकर भाजपचे मावळ तालुका अध्यक्ष होते. त्या कालावधीमध्ये पंचायत समितीच्या दहा गणांपैकी सात गणांचे जागावर भाजपा विजय झाले तर जिल्हा परिषदेच्या पाच गटांपैकी तीन गटावर भाजपचा विजय झाला होता. या सर्व बाबी लक्षात घेत म्‍हाळसकर यांच्‍यावर निवडणुकीच्‍या अनुंषगाने महत्त्वाची जबाबदारी सोपविली आहे.दरम्यान, नगरपंचायतमध्ये पहिले एक वर्ष राष्ट्रवादी व भाजप अशी सत्ता होती.

त्यानंतर झालेल्या विधानसभा निवडणुकीत आमदार सुनील शेळके हे विजयी झाले आणि नगरपंचायतमध्ये राष्ट्रवादीचे दोन गट एकत्र येऊन भाजप विरोधी पक्ष ठरला. नगरपंचायतची पहिली निवडणूक व त्यापूर्वीच्या ग्रामपंचायत काळात प्रामुख्याने वडगाव शहरात राष्ट्रवादी व भाजप एखादा अपवाद वगळता जवळपास समसमान संख्याबळ होते. त्यामुळे आगामी नगरपंचायत निवडणुकीत भाजपचा झेंडा फडकवण्याच्यादृष्टीने पक्षाने जोरदार तयारी सुरू केली आहे.