सातारा, (प्रतिनिधी) – लसीकरणाने गर्भाशय मुखाच्या कर्करोगास प्रतिबंध करता येतो. ही लस मुलींना देता येते. जागतिक आरोग्य संघटनेने म्हटल्याप्रमाणे, २०३० पर्यंत एचपीव्हीचे ९० टक्के लसीकरण पूर्ण करून येत्या शतकात हा आजार हद्दपार करण्याचे उद्दिष्ट आहे.

जगभरातील जवळपास १४० देशांनी आता एचपीव्हीचे लसीकरण सुरू केले असून साताऱ्यातील ऑन्को लाईफ केअर कॅन्सर सेंटरच्या वतीने २०२२ पर्यंत १५९८ महिलांनी लसीकरण केले आहे.

यामध्ये २० वर्षावरील ८५६ महिला तर २० वर्षाखालील ३४५ तरुणींनी लसीकरण केले आहे. १० जून २०२३ पर्यंत ३४५ महिलांनी लसीचा दुसरा डोस घेतला आहे तर, २० वर्षांपेक्षा कमी वयातील ४३ तरुणींनी लसीकरण केल्याची माहिती बीडीएस ऑन्कोडेंटिस्ट आणि संसर्ग नियंत्रण आणि लसीकरण विभागाचे प्रमुख डॉ. प्रसाद कवारे यांनी दिली.

त्यांनी सांगितले की, भारतीय महिलांमध्ये स्तन कर्करोगानंतर सर्वाधिक प्रमाणात गर्भाशय मुखाच्या कर्करोगाचे अर्थात सर्व्हायकल कॅन्सरचे प्रमाण जास्त आहे.

दरवर्षी भारतात सुमारे १ लाख २५ हजार महिलांना या कर्करोगाचे निदान होते व त्यातील ७५ हजार जणींचा मृत्यू होतो.

यातील बहुतांश, म्हणजे ९५ टक्के महिलांना ह्यूमन पापिलोमाव्हायरसमुळे (एचपीव्ही) हा कर्करोग होतो. गर्भाशय मुखातील पेशींच्या अनियंत्रित वाढीमुळे कर्करोगाचा धोका उद्भवत असल्याचे मत तज्ञांनी व्यक्त केले आहे.

असुरक्षित लैंगिक संबंध, एकाधिक लैंगिक भागीदार, लैंगिक संक्रमणातून होणारे आजार, गर्भनिरोधक गोळ्यांचा दीर्घकालीन वापर, धूम्रपान ही सर्व्हायकल कॅन्सरची प्रमुख कारणे आहेत.

नियमित तपासणी, अचूक निदान आणि लसीकरण हे गर्भाशय मुखाच्या कर्करोगापासून संरक्षण करण्याचे तीन प्रभावी मार्ग आहेत.

या कर्करोगापासून बचाव करण्याबाबत जागरूकता खूपच कमी आहे. चिंताजनक बाब म्हणजे सर्वसाधारण १० टक्क्यांपेक्षा कमी महिला या तपासणी करतात. या कर्करोगाची कोणतीही लक्षणे नसतानाही महिलांनी पॅप स्मीअर तपासणी करणे आवश्यक असते.

पौगंडावस्थेत मुलींना लस दिलयास प्रभावी ठरते
लैंगिकदृष्ट्या सक्रिय होण्याआधी पौगंडावस्थेत मुलींना ही लस दिली तर प्रभावी ठरते. अगदी ३५ ते ४५ वर्षे वयोगटातील प्रौढ महिला देखील या लसीसाठी पात्र आहेत,

अशी माहिती तज्ज्ञांनी दिली. रुटीन पॅप स्मीअर किंवा एचपीव्ही चाचणी ग्रीवाच्या पेशींमध्ये बदल शोधण्यात मदत करू शकते.

महिलांनी वयाच्या ३० वर्षांनंतर दर पाच ते दहा वर्षांनी ही तपासणी करत राहावी. त्याच वेळी, एचआयव्ही पॉझिटिव्ह महिलांनी वयाच्या 25 व्या वर्षापासून दर तीन वर्षांनी चाचणी घेणे सुरू केले पाहिजे.