विलमिंग्टन, (डेलावेर, अमेरिका) – भारतातून चोरीच्या मार्गाने किंवा तस्करी करून अमेरिकेत नेण्यात आलेल्या २९७ पुरातन वस्तू भारताला परत देण्‍याची ग्वाही अमेरिकेने दिली आहे. पंतप्रधान नरेंद्र मोदी यांनी अमेरिकेचे अध्यक्ष ज्यो बायडेन यांची भेट घेतली असता बायडेन यांनी मोदी यांना याबाबतचे आश्‍वासन दिले आहे.

पंतप्रधान मोदी आणि बायडेन यांच्यात आज झालेल्या द्विपक्षीय चर्चेदरम्यान भारत-अमेरिका दरम्यानची सर्वसमावेशक जागतिक धोरणात्मक भागीदारी अधिक भक्कम करण्याच्या मुद्यावर भर देण्यात आला. याचवेळी बायडेन यांनी मोदी यांना या पुरातन कलात्मक वस्तू परत देण्याची ग्वाही दिली. बायडेन यांच्या या सद्भभावनेच्या कृतीबद्दल पंतप्रधान मोदी यांनी बायडेन आणि अमेरिकेच्या सरकारला धन्यवाद दिले आहेत.

पुरातन वस्तूंच्या तस्करीला रोखण्यासाठी भारत आणि अमेरिकेदरम्यान जुलै महिन्यात पहिल्यांदाच एक करार करण्यात आला आहे. या करारानुसार संस्कृती आणि परंपरेचे जतन करण्यासाठी पुरातन कलात्मक वस्तूंची तस्करी रोखून त्या मूळ देशाकडे परत देण्याचे दोन्ही देशांनी मान्य केले आहे. या करारानुसार मूळ भारतातल्या २९७ कलात्मक पुरातन वस्तू भारताकडे सोपवल्या जाणार आहेत, असे परराष्ट्र मंत्रालयाचे प्रवक्ते रणधीर जैयस्वाल यांनी एक्सवर केलेल्या पोस्टमध्ये म्हटले आहे. या २९७ वस्तूंपैकी काही निवडक वस्तू पंतप्रधान मोदी आणि अध्यक्ष बायडेन यांनी समक्ष बघितल्या आणि त्या प्रतिकात्मक स्वरुपात भारताकडे सुपूर्त केल्या गेल्या.

PM Modi US visit : डेलावेरमधील निवासस्थानी ‘बायडेन आणि पंतप्रधान मोदींची’ भेट; दोन्ही नेत्यांकडून परस्परांच्या मतांची देवाणघेवाण

४ हजार वर्षांपुर्वीच्या कलात्मक वस्तूंचा खजिना…

अमेरिकेकडून भारताला परत देण्यात येणाऱ्या २९७ कलात्मक वस्तूंमध्ये ४ हजार वर्षांपुर्वीच्या अत्यंत दुर्मिळ आणि पुरातन कलात्मक वस्तूंचा समावेश आहे. काही वस्तूंचा कालावधी ख्रिस्तपूर्व २००० ते ख्रिस्तपूर्व १९०० दरम्यानचा आहे. देसाच्या विविध भागातून त्यांची तस्करी केली गेली होती. बहुतेक कलाकृती पूर्व भारतातील टेराकोटा कलाकृती असून उर्वरित कलाकृती दगड, धातू, लाकूड आणि हस्तिदंतापासून बनवलेल्या आहेत. यात १०-११ व्या शतकातील अप्सरेची मूर्ती, १५-१६ व्या शतकातील जैन तीर्थंकरांच्या मूर्तीं आणि दक्षिण भारतातील १७-१८ व्या शतकातील गणेशमूर्ती सारख्या अत्यंत दुर्मिळ कलाकृती देखील आहे.