US Iran War: इराण आणि अमेरिका-इस्रायल यांच्यातील युद्धाला आता पूर्णविराम मिळणार असल्याचे दिसत आहे. कारण आता अमेरिकेचे अध्यक्ष डोनाल्ड ट्रम्प यांनी मोठा दावा करत युद्धात विजय मिळवला असल्याचे म्हटले आहे. त्यांच्या या दाव्याने आता आंतरराष्ट्रीय स्तरावर संभ्रमाचे वातावरण निर्माण झाले आहे. इराणने अण्वस्त्रे विकसित न करण्यास पूर्णपणे सहमती दर्शवली असल्याची माहिती डोनाल्ड ट्रम्प यांनी दिली आहे. तसेच याविषयी पुढे बोलताना त्यांनी, अमेरिकेने इराणविरुद्धचे युद्ध जिंकले असून, तीन आठवडे चाललेल्या या संघर्षात विजय घोषित केला आहे.” त्यासोबतच इराणने अमेरिकेला होर्मुझच्या सामुद्रधुनीशी संबंधित तेल आणि वायूच्या संदर्भात एक महत्त्वपूर्ण भेट दिली असल्याचा खळबळजनक दावा देखील त्यांनी केला आहे. ओव्हल ऑफिसमधील ट्रम्प यांचे निवेदन US Iran War: ओव्हल ऑफिसमध्ये पत्रकारांशी बोलताना ट्रम्प म्हणाले की, इराण करार करण्यास उत्सुक आहे. त्यांनी सूचित केले की, उपराष्ट्रपती जे.डी. व्हान्स, परराष्ट्र सचिव मार्को रुबियो, मध्य पूर्वेसाठी विशेष दूत स्टीव्ह विटकॉफ आणि जावई जेरेड कुशनर हे वाटाघाटींचे नेतृत्व करत आहेत. US Iran War: अध्यक्ष म्हणाले की, सध्याच्या इराणी नेतृत्वात आधीच महत्त्वपूर्ण बदल झाले आहेत. त्यांनी याला “सत्तापालट” म्हटले आणि सांगितले की, नवीन नेते पूर्वी या समस्या निर्माण करणाऱ्या नेत्यांपेक्षा पूर्णपणे वेगळे आहेत. इराणची विशेष भेट काय आहे? मार्कवेन मुलीन यांच्या नव्या गृह सुरक्षा सचिवपदाच्या शपथविधी सोहळ्यानंतर, ट्रम्प यांनी पत्रकारांना सांगितले की, जास्त माहिती उघड करणे चुकीचे ठरेल, परंतु इराणने कधीही अण्वस्त्रे बाळगणार नाही असे मान्य केले आहे. ट्रम्प यांनी सांगितले की, इराणी नेतृत्वाने अमेरिकेला होर्मुझच्या सामुद्रधुनी आणि तेल पुरवठ्याशी संबंधित एक विशेष भेट दिली आहे. ते म्हणाले, “ते एक करार करणार आहेत. त्यांनी काल एक अद्भुत काम केले आणि आम्हाला एक भेट दिली. ती एक खूप मोठी आणि मौल्यवान भेट होती. ती भेट काय होती हे मी सांगणार नाही, पण ती तेल आणि वायूशी संबंधित होती.”असे म्हणत भेटीचे गुपित उघड करण्यास नकार दिला. पाकिस्तानकडून चर्चेचा प्रस्ताव US Iran War: यापूर्वी, ट्रम्प यांनी इराण आणि अमेरिका यांच्यात चर्चा घडवून आणणाऱ्या पाकिस्तानी पंतप्रधान शाहबाज शरीफ यांच्या सोशल मीडिया पोस्टला पाठिंबा दिला होता. शरीफ यांनी सुरू असलेल्या संघर्षावर सर्वसमावेशक तोडगा काढण्यासाठी चर्चेचे आयोजन करण्याचा प्रस्तावही दिला होता.
