US Iran Tensions:  अमेरिका आणि इराण यांच्यातील तणाव पुन्हा एकदा तीव्र झाला आहे. अमेरिकेचे संरक्षण सचिव पीट हेगसेथ यांनी इराणला इशारा दिला आहे की, जर इराणने अमेरिकेच्या नौदलाच्या जहाजांवर हल्ला केला, तर अमेरिका त्यांचे तेलवाहू जहाज नष्ट करून बुडवेल.

अमेरिकेच्या संरक्षण सचिवांचा कडक इशारा US Iran Tensions: 

पीट हेगसेथ यांनी सोशल मीडिया प्लॅटफॉर्मवर अमेरिकेच्या सेंट्रल कमांडचे (CENTCOM) कमांडर ॲडमिरल ब्रॅड कूपर यांचे एक निवेदन शेअर केले. कूपर यांनी इराणला इशारा,”जर इराणने अमेरिकेच्या जहाजांवर हल्ला केला, तर त्याला मोठी आर्थिक किंमत मोजावी लागेल” असा गंभीर इशारा दिला आहे.

हेगसेथ यांनी आपल्या पोस्टमध्ये, “हे अगदी सोपे आहे: जर इराणने अमेरिकेच्या जहाजांवर गोळीबार केला, तर आम्ही त्यांचे तेलवाहू जहाज नष्ट करून बुडवू. त्यांना फक्त अमेरिकेच्या नौदलावर हल्ला करण्यापासून रोखायचे आहे.” असे त्यांनी  म्हटले आहे.

कूपर यांनी स्वतंत्रपणे सांगितले की, जर इराणच्या इस्लामिक रिव्होल्यूशनरी गार्ड कॉर्प्सने (IRGC) अमेरिकेच्या दोन जहाजांवर हल्ला केला, तर अमेरिकन सैन्य तीन इराणी जहाजांना लक्ष्य करून प्रत्युत्तर देईल.

त्यांनी पुढे सांगितले की, अमेरिका आपल्या सैनिकांचे आणि जहाजांचे संरक्षण करण्यास मागेपुढे पाहणार नाही. गरज पडल्यास, इराणचा मर्यादित आणि सहज लक्ष्य करता येणारा तेलवाहू जहाजांचा ताफा देखील नष्ट केला जाऊ शकतो.

अमेरिकेने इराणच्या तीन तेलवाहू जहाजांवर हल्ला केला 

शनिवारी, अमेरिकेच्या इशाऱ्यापूर्वीच अमेरिकेने इराणच्या तीन तेलवाहू जहाजांवर हल्ला केला. यापैकी एक जहाज इराणचे प्रमुख तेल निर्यात केंद्र असलेल्या खारग बेटाजवळ होते. अमेरिकेच्या सेंट्रल कमांडच्या (CENTCOM) म्हणण्यानुसार, इराणच्या आयआरजीसीने (IRGC) अमेरिकेच्या नौदलाच्या दोन जहाजांवर बॅलिस्टिक क्षेपणास्त्रे डागल्यानंतर हे हल्ले झाले. CENTCOM ने सांगितले की, या हल्ल्यांमध्ये अमेरिकेचा कोणताही सैनिक जखमी झाला नाही.

यापूर्वी, इराणच्या आयआरजीसी नौदलाने पर्शियन आखात आणि होर्मुझच्या सामुद्रधुनीच्या आसपासच्या जहाजांना संशयास्पद हालचालींबद्दल इशारा दिला होता. इराणी सैन्याने होर्मुझच्या सामुद्रधुनीतून अनधिकृत मार्गांनी जाणाऱ्या तीन तेलवाहू जहाजांना लक्ष्य केल्याचा दावा केला आहे. त्यांनी वेगवेगळ्या भागांतील इतर तीन अमेरिकन जहाजांनाही लक्ष्य केल्याचा दावा केला आहे. तथापि, अमेरिकेने इराणच्या या दाव्यांना तात्काळ दुजोरा दिला नाही.

इराणनेही दिली मोठ्या हल्ल्याची धमकी  US Iran Tensions: 

अमेरिकेच्या हल्ल्यांनंतर आणि इशाऱ्यानंतर इराणनेही आपली भूमिका अधिक कठोर केली आहे. इराणच्या लष्करी कमांडने इशारा दिला आहे की, जर इराणी जहाजांचा छळ आणि सागरी नाकेबंदी सुरूच राहिली, तर या प्रदेशातील अमेरिकी लष्करी जहाजांवरील इराणचे हल्ले अधिक तीव्र होऊ शकतात.

इराणने म्हटले आहे की, अशा परिस्थितीत त्यांच्या हल्ल्याची व्याप्ती वाढू शकते आणि अमेरिकी लष्करी जहाजांचे पूर्वीपेक्षा जास्त नुकसान होऊ शकते. इराणची निम-सरकारी वृत्तसंस्था, तसनीमने असाही दावा केला आहे की, अमेरिकेकडून खारगजवळ नांगरलेल्या एका तेलवाहू जहाजावर चार क्षेपणास्त्रे डागण्यात आली. स्थानिक सूत्रांचा हवाला देत, या वृत्तसंस्थेने कळवले की या हल्ल्यात कोणतीही जीवितहानी झाली नाही आणि जहाजावरील कर्मचाऱ्यांना सुरक्षितपणे बाहेर काढण्यात येत आहे.