US-Iran News : इराणच्या अणू कार्यक्रमाच्या मुद्द्यावरून अमेरिका आणि इराणच्या प्रतिनिधींमध्ये जिनिव्हामध्ये जोरदार चर्चा झाली. वाटाघाटीच्या अनेक फेऱ्या यावेळी पार पडल्या, असे इराणचे परराष्ट्र मंत्री अब्बास अराघची यांनी सांगितले. इराणमधील सरकारी वृत्तवाहिनीवरच्या एका मुलाखतीदरम्यान बोलताना त्यांनी या चर्चेबाबतचा कोणताही तपशील दिला नाही. जे काही होणे आवश्यक होते, ते आमच्या बाजूने आम्ही नियोजित केले आहे, असे अराघची म्हणाले. या चर्चेसंदर्भात अमेरिकेकडून अद्याप कोणतीही प्रतिक्रिया आलेली नाही. प्रतिक्रियेसाठी केलेल्या विनंतीला व्हाइट हाउसकडून कोणताही प्रतिसाद मिळू शकला नाही. इराणच्या अणुकार्यक्रमावर गुरुवारी इराण आणि अमेरिकेने तासन्तास अप्रत्यक्ष वाटाघाटी केल्या. परंतु कोणत्याही कराराविना दोन्ही देशांचे प्रतिनिधी निघून गेले. कोणताही सकारात्मक निष्कर्ष निघू न शकल्यामुळे मध्यपूर्वेतील तणाव कमी झाला नाही. अमेरिकेने या प्रदेशात विमाने आणि युद्धनौकांचा मोठा ताफा जमवला असल्याने मध्यपूर्वेतील आणखी एका युद्धाचा धोका अजूनही कायम आहे. जिनिव्हा येथे इराण आणि अमेरिकेच्या प्रतिनिधींमध्ये ओमानचे परराष्ट्र मंत्री बद्र अल-बुसैदी यांनी मध्यस्थाची भूमिका बजावली होती. त्यांनी मात्र या चर्चेमध्ये लक्षणीय प्रगती झाली असल्याचे सांगितले. पण त्यांनीही या चर्चेबाबतचा कोणताही तपशील दिला नाही. अणू उर्जेबाबतची चर्चा तांत्रिक प्रतिनिधींबरोबर यापुढेही सुरू राहणार आहे. आंतरराष्ट्रीय अणू उर्जा एजन्सीचे मुख्यालय असलेल्या व्हिएन्ना येथे तांत्रिक प्रतिनिधींची बैठक पुढील आठवड्यात होणार आहे. पण दोन्ही बाजूंपैकी कोणीही या बैठकीबाबत काहीही मत व्यक्त केलेले नाही. युरेनियम समृद्ध करणे सुरू राहणार आपल्या देशातील युरेनियम अन्य एखाद्या देशात हलवण्याचा प्रस्ताव इराणने फेटाळला असून युरेनियम संवर्धन करणे यापुढच्या काळातही सुरू ठेवण्याचा निर्णय घेतला असल्याची माहिती मिळते आहे. लांब पल्ल्यांची क्षेपणास्त्रे किंवा हमास, हिज्बुल्लाह सारख्या सशस्त्र गटांना दिले जाणारे सहकार्य या विषयांवर चर्चा करण्यास देखील तयारी दाखवलेली नाही. इराणवर घातलेले आंतरराष्ट्रीय निर्बंध हटवण्यात यावेत, अशी मागणीही इराणने केली आहे. त्यामुळे ट्रम्प यांच्या अपेक्षांची पूर्तता इराणकडून होणार नाही, याचेच संकेत मिळाले आहेत.
