US Income Tax: अमेरिकेने लावलेले आयात शुल्क परदेशी कंपन्या भरतील. यामुळे आधुनिक जगातील प्राप्ती कर संकल्पना अमेरिकेसाठी संपुष्टात येईल. प्राप्ती कराऐवजी आयात शुल्क ही संकल्पना रूढ होईल, या मताचा अमेरिकेचे अध्यक्ष डोनाल्ड ट्रम्प यांनी अमेरिकन संसदेत केलेल्या भाषणात पुनरुच्चार केला आहे. या अगोदर प्रचारावेळी ट्रम्प यांनी ही संकल्पना मांडली होती. कसं शक्य आहे? ट्रम्प यांनी सांगितले की, बरेच देश अमेरिकन वस्तूवर आयात शुल्क लावत असताना अमेरिका त्या देशावर आयात शुल्क लावत नसे. त्यामुळे या देशांनी अमेरिकेची अनेक दशकापासून लूट केली. आता परिस्थिती उलटी झाली आहे. आता संबंधित देश अमेरिकेवर आयात शुल्क लावत नाहीत आणि अमेरिका त्या देशावर आयात शुल्क लावत आहे. त्यामुळे अमेरिकेच्या तिजोरीत डॉलर येत आहेत. असे होत असतानाच महागाईचा दरही वाढत नाही. या उत्पन्नामुळे अमेरिकन नागरिकांना आगमी काळामध्ये प्राप्तिकर भरण्याची गरज पडणार नाही, असा दावा ट्रम्प यांनी केला. ट्रम्प यांचे शुल्क घटनाबाह्य असल्याचा निर्णय अमेरिकेच्या सर्वोच्च न्यायालयाने दिल्यानंतर ट्रम्प यांनी न्यायालयावर टीका केली. अमेरिकेच्या भल्यासाठी आयात शुल्क लावत आहे. मला आयात शुल्क लावण्याचा अधिकार आहे. बरेच देश अमेरिकेबरोबर व्यापार करार करीत आहेत आणि अध्यक्षांनाच व्यापार करार करण्याचा आणि आयात शुल्क लावण्याचा अधिकार आहे हे या देशांनी मान्य केले आहे. त्यामुळे आपली विषय पत्रिका पुढे चालूच राहील. मात्र जे देश न्यायालयाच्या निर्णयाच्या आधारावर करारातून अंग काढून घेतील त्यांच्या विरोधात शुल्क लावणार असल्याचे ट्रम्प यांनी स्पष्ट केले. मात्र अनेक देशासमोर ट्रम्प यांचे ऐकावे की अमेरिकेच्या सर्वोच्च न्यायालयाचे ऐकावे हा प्रश्न निर्माण झाला आहे. शुल्कामुळे अमेरिकेची अर्थव्यवस्था सुधारत आहे. त्याचबरोबर जागतिक शांतता निर्माण होत आहे असा दावा ट्रंप यांनी केला. जे देश जगात अशांतता निर्माण करतील त्यांच्या विरोधात आपण शुल्काचा वापर करीत आहोत. हा वापर यशस्वी होत आहे. त्यामुळे अमेरिकेला जगात शांतता निर्माण करण्यासाठी सशस्त्र हस्तक्षेपाची गरज पडत नाही असे म्हणाले.
