वॉशिंग्टन – डेमोक्रॅटिक पक्षाच्या अध्यक्षपदाच्या उमेदवार कमला हॅरिस यांनी गुरुवारी डोनाल्ड ट्रम्प यांच्यावर जोरदार हल्ला चढवला. त्यांनी ट्रम्प यांना अस्थिर व्यक्ती म्हटले आहे. हॅरिस यांनी ट्रम्प यांच्या पात्रतेवर प्रश्नचिन्ह उपस्थित केले आणि त्यांना वैद्यकीय अहवाल सार्वजनिक करण्याचे आव्हान दिले. मात्र, ट्रम्प यांनी अद्याप त्यांचा वैद्यकीय अहवाल सार्वजनिक केलेला नाही. याउलट, कमला हॅरिस यांनी अधिकृत एक्स अकाउंटवर त्यांचे वैद्यकीय अहवाल शेअर केले आहेत. ट्रम्प त्यांच्या अध्यक्षपदाच्या काळात सार्वजनिक निषेधाविरूद्ध सैन्यबळाचाच वापर करण्याबाबत उत्सूक होते अशी गंभीर बाब अलिकडेच त्यांच्या माजी सल्लागारांनी उघड केली आहे. तसेच एका कार्यक्रमात ट्रम्प यांनी डेमोक्रॅट आणि डावे पक्षांचे अंतर्गत शत्रू असे वर्णन केले होते. त्या पाश्र्वभूमीवर कमला हॅरिस यांनी ट्रम्प यांच्या संदर्भात केलेली टिप्पणी महत्वाची ठरते आहे. त्यांनी अमेरिकन लोकांच्या विरोधात अमेरिकन सैन्याचा वापर करण्याबद्दल विधान केले आहे. त्या लोकांची तुरूंगात रवानगी करण्याबाबत ट्रम्प बोलले आहेत.तेही कशासाठी तर त्यांच्याशी असहमती असल्यामुळे. त्यामुळे ट्रम्प हे एक अस्थिर व्यक्ती आहेत व आपण सगळ्यांनी याची चिंता केली पाहिजे असे कमला हॅरिस यांनी म्हटले आहे. कमला हॅरिस यांनी डोनाल्ड ट्रम्प यांना त्यांचे वैद्यकीय तपासणी अहवाल सार्वजनिक करण्याचे आव्हान दिले आहे. हॅरिस म्हणाल्या की मी माझे वैद्यकीय रेकॉर्ड जारी केले आहेत. डोनाल्ड ट्रम्प यांनीही तेच करायला हवे. त्या पुढे म्हणाल्या की, ट्रम्प यांच्या रॅली पाहण्यासाठी आणि त्यांच्या बौद्धिक सूक्ष्मतेवर निर्णय घेण्यासाठी मी जनतेला आमंत्रित करते. दरम्यान, व्हाइट हाऊसने शनिवारी कमला हॅरिसचा वैद्यकीय अहवाल जाहीर केला. त्यानुसार त्या पूर्णपणे निरोगी आहेत. एवढेच नाही तर त्या अध्यक्षपदासाठीही योग्य आहेत. वैद्यकीय अहवालानुसार कमला हॅरिस यांच्याकडे अध्यक्षपदासाठी आवश्यक शारीरिक आणि मानसिक क्षमता आहे. या वर्षी ऑगस्टमध्ये एका पत्रकाराने डोनाल्ड ट्रम्प यांना वैद्यकीय अहवाल सार्वजनिक करण्यास सांगितले होते. यावर ट्रम्प यांनी वैद्यकीय नोंदी आनंदाने जाहीर करणार असल्याचे सांगितले होते. पण त्यांनी अजून एकही रेकॉर्ड जारी केलेला नाही. दरम्यान, कमला हॅरिस यांनी वैद्यकीय अहवाल जाहीर करण्यासाठी त्यांच्यावर दबाव वाढवला आहे. हॅरिस यांच्या आव्हानावर ट्रम्प यांच्या प्रचार पथकाने फक्त कमांडर इन चीफ होण्यासाठी ते पूर्णपणे निरोगी असल्याचे सांगितले होते.
