UPSC Result : केंद्रीय लोकसेवा आयोगाच्या नागरी सेवा परीक्षा (CSE) 2025 चा निकाल शुक्रवारी जाहीर करण्यात आला. यंदाच्या निकालात अनुज अग्निहोत्री याने देशात पहिला क्रमांक पटकावला आहे, तर हरियाणातील पंचकुला येथील एकांश ढुल याने ऑल इंडिया तिसरा क्रमांक मिळवत मोठे यश संपादन केले आहे. एकांश ढुल याने यापूर्वीही दोन वेळा यूपीएससी परीक्षा उत्तीर्ण केली आहे. 2024 मध्ये जाहीर झालेल्या निकालात त्याने 342 वा क्रमांक मिळवला होता. त्यानंतर 2025 मध्ये 296 वा क्रमांक पटकावला. मात्र सातत्यपूर्ण प्रयत्नांमुळे 2026 मध्ये जाहीर झालेल्या निकालात त्याने थेट तिसरे स्थान मिळवत उल्लेखनीय कामगिरी केली. एकांशचे वडील कृष्ण ढुल हे हरियाणातील भाजपचे वरिष्ठ नेते आणि प्रवक्ते असून हरियाणा धनुर्विद्या असोसिएशनचे अध्यक्षही आहेत. त्यांची आई निर्मला ढुल या सरकारी शाळेत मुख्याध्यापक म्हणून कार्यरत आहेत. एकांशचे शालेय शिक्षण भवन विद्यालय, चंदीगड येथे झाले. त्याने दहावीपर्यंतचे शिक्षण तेथे पूर्ण केले, तर बारावीचे शिक्षण संत कबीर पब्लिक शाळेत घेतले. पुढील उच्च शिक्षणासाठी तो दिल्लीला गेला आणि श्री राम कॉलेज ऑफ कॉमर्समधून येथून बीए पदवी पूर्ण केली. दरम्यान, हरियाणाचे मुख्यमंत्री नायब सिंह सैनी यांनी एकांश ढुल याला फोन करून अभिनंदन केले. “एकांशसारख्या तरुणांचे यश विकसित भारताच्या स्वप्नाला साकार करण्यासाठी मजबूत आधारस्तंभ ठरेल,” असे त्यांनी सांगितले. यंदा झालेल्या नागरी सेवा परीक्षेत एकूण ९५८ उमेदवारांची निवड झाली आहे. त्यात ३१७ खुला वर्ग, ३०६ ओबीसी, १५८ अनुसूचित जाती (SC), १०४ आर्थिकदृष्ट्या दुर्बल घटक (EWS) आणि ७३ अनुसूचित जमाती (ST) उमेदवारांचा समावेश आहे.
