Political News : उत्तर प्रदेशच्या राजकीय वर्तुळातून (Political News) एक मोठी आणि धक्कादायक बातमी समोर आली आहे. तब्बल ६ वर्षांनंतर औरैय्याच्या बहुचर्चित दुहेरी हत्याकांड प्रकरणाचा निकाल लागला असून, विशेष खासदार-आमदार न्यायालयाने समाजवादी पार्टीचे माजी आमदार कमलेश पाठक आणि त्यांचा भाऊ संतोष पाठक यांच्यासह एकूण १० जणांना दोषी ठरवत जन्मठेपेची कठोर शिक्षा सुनावली आहे.

औरैयामधील पंचमुखी हनुमान मंदिराजवळील एका जमिनीच्या तुकड्यावरून (Political News) सुरू झालेल्या वादाचे रूपांतर अत्यंत भीषण हत्याकांडात झाले होते.धक्कादायक बाब म्हणजे, माजी आमदार कमलेश पाठक आणि प्रसिद्ध वकील मंजुल चौबे हे एकेकाळी अत्यंत जिवलग मित्र मानले जात होते.

राजकीय तसेच सामाजिक व्यासपीठांवर नेहमी खांद्याला खांदा लावून वावरणारे हे मित्र जमिनीच्या वादातून एकमेकांचे कट्टर वैरी बनले. हा वाद इतका विकोपाला गेला की ६ वर्षांपूर्वी वकील मंजुल चौबे आणि त्यांची चुलत बहीण सुधा चौबे यांची निर्घृण हत्या करण्यात आली.

या रक्तरंजित घटनेनंतर पोलिसांनी सखोल तपास करून न्यायालयात आरोपपत्र दाखल केले. तब्बल ६ वर्षे चाललेल्या या सुनावणीदरम्यान दोन्ही बाजूंच्या वकिलांनी जोरदार युक्तिवाद केला, पुरावे आणि साक्षीदार तपासण्यात आले.

अखेर न्यायालयाने (Political News) माजी आमदार कमलेश पाठक, संतोष पाठक यांच्यासह अन्य साथीदारांना दोषी ठरवत जन्मठेपेची शिक्षा ठोठावली. या प्रकरणातील एक आरोपी अल्पवयीन असल्याने त्याचा खटला बाल न्याय मंडळासमोर प्रलंबित आहे. एकेकाळच्या घनिष्ठ मैत्रीचा असा रक्तरंजित आणि भयावह शेवट झाल्याने संपूर्ण जिल्ह्यात आणि राजकीय वर्तुळात प्रचंड खळबळ उडाली आहे.