Jamkhed : जामखेडमध्ये महायुतीच्या ऐक्याचे दर्शन; संध्या सोनवणे यांच्या शुभेच्छा फलकाची राजकीय वर्तुळात जोरदार चर्चा
Jamkhed : जिल्हा नियोजन समितीच्या सदस्या कु. संध्या उद्धव सोनवणे यांच्या वतीने लावण्यात आलेल्या या फलकांवर महायुतीच्या सर्व प्रमुख नेत्यांचे फोटो एकत्रितपणे झळकल्याने, स्थानिक पातळीवर सर्व घटक पक्षांना सोबत घेऊन जाण्याचा प्रयत्न दिसून येत असल्याची चर्चा नागरिकांमध्ये आहे.

जामखेड :अहिल्यानगर जिल्हा मध्यवर्ती सहकारी बँकेच्या चेअरमनपदी डॉ. सुजय विखे पाटील यांची निवड झाल्यानिमित्त आणि त्यांच्या वाढदिवसाचे औचित्य साधून जामखेड शहरात लावण्यात आलेले डिजिटल फलक सध्या राजकीय वर्तुळात चर्चेचा विषय ठरले आहेत. जिल्हा नियोजन समितीच्या सदस्या कु. संध्या उद्धव सोनवणे यांच्या वतीने लावण्यात आलेल्या या फलकांवर महायुतीच्या सर्व प्रमुख नेत्यांचे फोटो एकत्रितपणे झळकल्याने, स्थानिक पातळीवर सर्व घटक पक्षांना सोबत घेऊन जाण्याचा प्रयत्न दिसून येत असल्याची चर्चा नागरिकांमध्ये आहे.
राज्यातील काही भागांमध्ये महायुतीच्या नेत्यांमध्ये फलकांवरील फोटोंवरून किंवा श्रेयवादावरून मतभेद असल्याचे चित्र अनेकदा चर्चेत असते. या पार्श्वभूमीवर जामखेडमधील या फलकांवर मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्यासोबतच पालकमंत्री राधाकृष्ण विखे पाटील आणि विधानपरिषदेचे सभापती प्रा. राम शिंदे यांचे फोटो एकाच रांगेत लावण्यात आले आहेत.
जिल्हा नियोजन समितीच्या सदस्या म्हणून कार्यरत असलेल्या संध्या सोनवणे यांनी राज्याच्या शीर्षस्थ नेतृत्वासह जिल्ह्यातील दोन्ही प्रमुख नेत्यांना एकाच फलकावर स्थान देऊन महायुतीतील समन्वयाचे चित्र मांडले असल्याचे स्थानिक कार्यकर्त्यांकडून बोलले जात आहे. डॉ. सुजय विखे पाटील यांना चेअरमनपदाच्या निवडीबद्दल व वाढदिवसानिमित्त शुभेच्छा देणाऱ्या या फलकांमुळे जामखेडच्या राजकीय वर्तुळात विविध चर्चांना उधाण आले आहे.





