Pune Accident : उंड्री चौकातील जमजम हॉटेलसमोर सोमवारी (१४ सप्टेंबर) सायंकाळी झालेल्या अपघातात ट्रकच्या मागील चाकाखाली सापडून ३४ वर्षीय तरुणाचा मृत्यू झाला. विनोद सोनी (वय ३४, रा. हांडेवाडी, हडपसर) असे मृत्यू झालेल्या तरुणाचे नाव आहे.

पोलिसांनी दिलेल्या माहितीनुसार, विनोद सोनी हे हांडेवाडीहून चौकाच्या दिशेने मुख्य रस्त्याने जात होते. सायंकाळी साडेसातच्या सुमारास उंड्री चौकातील जमजम हॉटेलसमोर ते ट्रक क्रमांक KA-56-3098 च्या मागील चाकाखाली आले. या अपघातात गंभीर जखमी झाल्याने त्यांचा मृत्यू झाला.

अपघाताची माहिती मिळताच उंड्री पोलीस चौकीचे अंमलदार निलेश जगताप यांनी घटनास्थळी धाव घेतली. पोलिसांनी घटनास्थळाचा पंचनामा केला असून, ट्रकचालक रेहमान ऐसा पटेल (वय ६५, रा. बिदर, कर्नाटक) याला ट्रकसह ताब्यात घेतले आहे.

या प्रकरणी गुन्हा दाखल करण्याची प्रक्रिया सुरू असून, पुढील कायदेशीर कारवाई करण्यात येत असल्याचे पोलिसांनी सांगितले.