Narayangaon:  जुन्नर तालुक्यातील येडगाव-नारायणगाव परिसरात विहिरीवरील मोटारींच्या केबल चोरीच्या वाढत्या घटनांना आळा घालण्यासाठी परिसरात सीसीटीव्ही कॅमेरे बसविण्याचा निर्णय घेण्यात आला आहे. केबल चोरीमुळे शेतकऱ्यांचे मोठ्या प्रमाणात आर्थिक नुकसान होत असल्याने ग्रामस्थ व शेतकऱ्यांनी पुढाकार घेत ही उपाययोजना हाती घेतली आहे.

याबाबत नारायणगाव पोलीस ठाण्याचे सहाय्यक पोलिस निरीक्षक प्रवीण संपांगे व पोलीस अधिकारी जगदीश पाटील यांच्या उपस्थितीत येडगाव येथे शेतकरी बैठकीचे आयोजन करण्यात आले होते. पोलीस पाटील गणेश बांगर यांच्या पुढाकारातून झालेल्या या बैठकीस माजी सरपंच बाबाशेठ नेहरकर, सरपंच गुलाब नेहरकर, माजी उपसरपंच हर्षद गावडे, तंटामुक्ती अध्यक्ष गोपीनाथ भोर, माजी उपसरपंच अंकुश भोर यांच्यासह शेतकरी व ग्रामस्थ मोठ्या संख्येने उपस्थित होते.

केबल चोरीच्या घटनांमध्ये वाढ –

जुन्नर तालुक्यात अलीकडच्या काळात केबल चोरीच्या घटनांमध्ये वाढ झाल्याने पोलिस प्रशासनाने शेतकऱ्यांना सीसीटीव्ही कॅमेरे बसविण्याचे आवाहन केले होते. या आवाहनाला प्रतिसाद देत येडगाव धरण परिसरातील लिफ्टधारक शेतकरी व ग्रामपंचायतीने संयुक्तपणे सीसीटीव्ही यंत्रणा उभारण्याचा निर्णय घेतला आहे. त्यानुसार परिसरात कॅमेरे बसविण्याचे काम सुरू करण्यात आले असून त्यासाठी सुमारे दोन लाख रुपयांचा खर्च अपेक्षित असल्याची माहिती बैठकीत देण्यात आली.

याशिवाय आधुनिक तंत्रज्ञानयुक्त मीटर बसविण्याचाही निर्णय शेतकऱ्यांनी घेतला आहे. संबंधित मीटरमधील वायर कट झाल्यास शेतकऱ्यांना तत्काळ मोबाईल संदेशाद्वारे सूचना मिळणार असल्याने चोरी रोखण्यास मदत होणार आहे.

दरम्यान, विविध उपाययोजना राबविल्यानंतरही भविष्यात केबल चोरीच्या घटना पूर्णपणे थांबण्यासाठी पोलिस प्रशासनाने अधिक दक्षता घ्यावी, अशी अपेक्षा उपस्थित शेतकऱ्यांनी व्यक्त केली.