पिंपरी – प्राधिकरण परिसरातील बीएसएनएल (BSNL)च्या भूमिगत इन्स्पेक्शन डक्टमध्ये उतरलेल्या दोन तरुणांचा गुदमरून मृत्यू झाल्याची धक्कादायक घटना गुरुवारी मध्यरात्री घडली. लोकमान्य हॉस्पिटलशेजारी, निर्मल विला बंगल्यासमोर ही घटना घडली. या घटनेमुळे परिसरात खळबळ उडाली आहे.

लोकमान्य हॉस्पिटलकडून भेळ चौकाकडे जाणाऱ्या रस्त्यावरील BSNL इन्स्पेक्शन डक्टमध्ये काही कामानिमित्त दोन तरुण उतरले होते. डक्टमध्ये उतरल्यानंतर त्यांना श्वास घेण्यास त्रास झाला असावा. त्यानंतर दोघांचाही मृत्यू झाल्याची प्राथमिक माहिती पोलिसांना मिळाली.

मनोज बाबुराव शिंदे (वय २६, रा. नाशिक जेल रोड, मूळ रा. सिद्धेश्वर, ता. औंढा, जि. हिंगोली) आणि अमोल अशोक शिंदे (वय २०, मूळ रा. सिद्धेश्वर, ता. औंढा, जि. हिंगोली) अशी मृतांची नावे आहेत.

डक्टमध्ये ऑक्सिजनची कमतरता, विषारी वायू किंवा अन्य कारणामुळे त्यांचा गुदमरून मृत्यू झाला असण्याची शक्यता पोलिसांनी व्यक्त केली आहे. मात्र, मृत्यूचे नेमके कारण शवविच्छेदन आणि वैद्यकीय अहवालानंतरच स्पष्ट होणार आहे.

वर्षभरानंतर त्याच ठिकाणी पुन्हा दुर्घटना
विशेष म्हणजे, साधारण वर्षभरापूर्वी याच ठिकाणी अशाच स्वरूपाची दुर्घटना घडली होती. त्या घटनेत तीन जणांचा मृत्यू झाला होता. याप्रकरणी निगडी पोलीस ठाण्यात गुन्हा क्रमांक ३७३/२०२५ अन्वये भारतीय न्याय संहितेच्या कलम १०५ नुसार सदोष मनुष्यवधाचा गुन्हा दाखल करण्यात आला होता. या प्रकरणाचे दोषारोपपत्र न्यायालयात सादर करण्यात आले आहे.

एकाच ठिकाणी वर्षभराच्या अंतराने पुन्हा दोन जणांचा मृत्यू झाल्याने संबंधित भूमिगत डक्टमधील सुरक्षिततेचा प्रश्न ऐरणीवर आला आहे. डक्टमध्ये उतरण्यापूर्वी ऑक्सिजनची पातळी तपासली होती का, तसेच सुरक्षिततेच्या आवश्यक उपाययोजना करण्यात आल्या होत्या का, याचा तपास आता पोलिसांकडून केला जात आहे.

घटनास्थळाची तांत्रिक तपासणी करण्यासाठी फॉरेन्सिक मोबाईल व्हॅनही पाचारण करण्यात आली आहे. मृत्यूमागील नेमके कारण आणि घटनेची संपूर्ण पार्श्वभूमी तपासानंतर स्पष्ट होणार आहे.

Kangana Ranaut: ‘स्मॅश द पॅट्रिआर्की’वर कंगनाचा राहुल गांधींना खोचक टोला; म्हणाली, “ब्रो, वेट… भारत माता की जयपासून सुरुवात करूया!”