पुणे: शाश्वत विकास आणि पर्यावरणाच्या क्षेत्रात नाविन्यपूर्ण प्रयोग करणाऱ्या युवा संशोधकांना प्रोत्साहन देण्यासाठी ‘शेफलर इंडिया’ या आघाडीच्या मोशन टेक्नॉलॉजी कंपनीने २०२५ च्या ‘सोशल इनोव्हेटर फेलोशिप’ कार्यक्रमाचे विजेते घोषित केले आहेत. या प्रतिष्ठित फेलोशिपसाठी देशभरातून निवडण्यात आलेल्या १० विजेत्यांमध्ये पुण्यातील शाश्वत शर्मा आणि मिहीर या दोन तरुणांनी बाजी मारली आहे.

प्रदूषणावर मात करणारे ‘कार्बन एम’ (Carbon M) तंत्रज्ञान पुण्यातील या दोन इनोव्हेटर्सनी ‘कार्बन एम’ नावाचे एक विशेष तंत्रज्ञान विकसित केले आहे. भारतात टायर पायरोलिसिस प्लांटमधून मोठ्या प्रमाणावर टाकाऊ वायू बाहेर पडतात, जे अनेकदा अकार्यक्षमरीत्या जाळले जातात. यामुळे हवेचे प्रदूषण वाढते. शाश्वत आणि मिहीर यांच्या ‘कार्बन एम’ तंत्रज्ञानामुळे या उत्सर्जित वायूंचे रूपांतर उपयुक्त इंधनात केले जाते. यामुळे केवळ वायू प्रदूषण कमी होत नाही, तर उद्योगांची कार्यक्षमता वाढून स्वच्छ औद्योगिक कामकाजास मदत होते.

पुरस्काराचे स्वरूप आणि मार्गदर्शन

या फेलोशिपसाठी देशभरातील २१ राज्यांतून ४६० हून अधिक अर्ज आले होते. त्यातून निवडल्या गेलेल्या १० प्रकल्पांना प्रत्येकी १.७५ लाख रुपयांचे अनुदान देण्यात आले आहे. तसेच, या विजेत्यांना अहमदाबाद येथील ‘आयआयएम’ (IIMA Ventures) मध्ये २४ आठवड्यांचे विशेष मार्गदर्शन (Mentorship) दिले जाईल. याद्वारे त्यांना आपले प्रकल्प व्यावसायिक स्तरावर नेण्यासाठी तांत्रिक आणि बाजारपेठेचे धडे मिळतील.

शेफलर इंडियाचे एमडी आणि सीईओ हर्षा कदम यांनी विजेत्यांचे अभिनंदन करताना सांगितले की, “तंत्रज्ञान आणि मानवी जाणीव जेव्हा एकत्र येते, तेव्हा एक चांगल्या जगाची निर्मिती होते. पर्यावरणाचे रक्षण करणाऱ्या युवा बदलकर्त्यांना पाठबळ देणे ही आमची सामाजिक जबाबदारी आहे.” गोखले इन्स्टिट्यूटचे संचालक प्रा. गुरुदास नुलकर आणि अन्य मान्यवरांच्या उपस्थितीत हा पुरस्कार सोहळा पार पडला.