MegaBlock: मुंबई-पुणे यशवंतराव चव्हाण द्रुतगती मार्गावरून प्रवास करणाऱ्या प्रवाशांसाठी एक अत्यंत महत्त्वाची बातमी आहे. डोंगरगाव आणि कुसगाव दरम्यान असलेल्या पुलाच्या देखभालीचे काम हाती घेण्यात आल्यामुळे आगामी २३ आणि २४ एप्रिल रोजी या मार्गावरील वाहतूक प्रत्येकी तीन तासांसाठी पूर्णपणे बंद ठेवण्यात येणार आहे. महाराष्ट्र राज्य रस्ते विकास महामंडळाकडून (MSRDC) कि.मी. क्र. ५८/५०० येथे पुलाचे शटरिंग काढणे आणि रंगकामाचे नियोजन करण्यात आले असून, सुरक्षेच्या कारणास्तव हा निर्णय घेण्यात आला आहे. बंद मार्ग आणि पर्यायी मार्ग- या नियोजित कामामुळे २३ एप्रिल २०२६ रोजी मुंबईकडे जाणारी वाहतूक दुपारी १२ ते ३ वाजेपर्यंत पूर्णतः थांबवण्यात येईल. या काळात प्रवाशांना पर्यायी मार्गाचा वापर करावा लागणार असून, सर्व वाहने किवळे, देहूरोड आणि तळेगाव मार्गे राष्ट्रीय महामार्ग ४८ वरून कुसगाव टोल प्लाझा येथे वळवण्यात येतील. त्यानंतर २४ एप्रिल रोजी पुण्याकडे येणाऱ्या मार्गावर दुपारी १२ ते ३ या वेळेत असाच ब्लॉक घेण्यात येणार आहे. पुण्याकडे येणारी वाहने कुसगाव टोल प्लाझावरून राष्ट्रीय महामार्ग ४८ कडे वळवून देहू रोड आणि किवळे मार्गे पुन्हा मुख्य मार्गावर आणली जातील. प्रवाशांनी या बदलाची नोंद घेऊन आपल्या प्रवासाचे योग्य नियोजन करावे, असे आवाहन रस्ते विकास महामंडळाने केले आहे. प्रवासादरम्यान कोणतीही अडचण किंवा आपत्कालीन परिस्थिती उद्भवल्यास वाहनचालकांनी नियंत्रण कक्षाच्या ९८२२४९८२२४ किंवा महामार्ग पोलीस विभागाच्या ९८३३४९८३३४ या क्रमांकावर संपर्क साधण्याचे सूचित करण्यात आले आहे. जप्त केलेल्या वाहनांचा २८ एप्रिलला जाहीर लिलाव – दरम्यान, पुणे जिल्ह्यातील तळेगाव दाभाडे येथील राज्य उत्पादन शुल्क विभागाने विविध गुन्ह्यांमध्ये जप्त केलेल्या वाहनांच्या लिलावाची घोषणा केली आहे. हा जाहीर लिलाव २८ एप्रिल २०२६ रोजी सकाळी ११:३० वाजता पार पडणार आहे. यामध्ये एकूण २ ट्रक कंटेनर, २० चारचाकी वाहने आणि २५ दुचाकी वाहनांचा समावेश आहे. या लिलावाबाबत अधिक तपशील हवा असल्यास इच्छुकांनी तळेगाव दाभाडे येथील राज्य उत्पादन शुल्क विभागाचे निरीक्षक उत्तम आव्हाड यांच्याशी संपर्क साधावा, असे प्रशासनाकडून स्पष्ट करण्यात आले आहे.
