Donald Trump: अमेरिकेचे राष्ट्राध्यक्ष डोनाल्ड ट्रम्प यांनी पॅलेस्टाईन प्रदेश असलेल्या गाझा पट्टीवर कब्जा करणार असल्याचे धक्कादायक वक्तव्य केले. इस्रायलचे पंतप्रधान बेंजामिन नेतन्याहू यांनी अमेरिकेचे राष्ट्रपती ट्रम्प यांची भेट घेतली. दोन्ही नेत्यांमध्ये विविध मुद्यांवर चर्चा झाली. बैठकीनंतर दोन्ही नेत्यांनी संयुक्त पत्रकार परिषद घेतली. यावेळी बोलताना ट्रम्प यांनी गाझा पट्टी ताब्यात घेणार असल्याचे म्हटले आहे.

डोनाल्ड ट्रम्प म्हणाले की, अमेरिका युद्धामुळे उद्ध्वस्त झालेला पॅलेस्टाईन प्रदेश गाझा पट्टी ताब्यात घेणार आहे. पॅलेस्टाइन नागरिकांना जोपर्यंत अन्य ठिकाणी पुनर्वसित केले जात नाही,तोपर्यंत अमेरिका तेथे असेल. सोबतच, गाझाचा विकास देखील केला जाईल, असेही ते म्हणाले.

इस्रायल आणि दहशतवादी संघटना हमास यांच्यात ऑक्टोबर 2023 पासून सुरू असलेल्या संघर्षामुळे गाझा पट्टी पूर्णपणे उद्ध्वस्त झाली आहे. काही दिवसांपूर्वीच युद्धविरामाची घोषणा करण्यात आली. या युद्धात गाझा पट्टी प्रदेशाचे प्रचंड नुकसान झाले आहे. तसेच, लाखो लोकं बेघर झाले आहेत.

याच पार्श्वभूमीवर आता ट्रम्प यांनी महत्त्वाचे विधान केले आहे. पत्रकार परिषदेत बोलताना ट्रम्प म्हणाले की, आम्ही हा प्रदेश आपल्या ताब्यात घेऊ आणि येथे पडलेल्या धोकादायक स्फोटक तसेच अन्य शस्त्रास्त्र नष्ट करण्याची जबाबदारी स्वीकारू. आम्ही उद्ध्वस्त झालेल्या इमारती पुन्हा उभारू. आर्थिक विकास योजना तयार करू, ज्यामुळे या प्रदेशातील लोकांसाठी मोठ्या प्रमाणात रोजगार आणि निवास उपलब्ध होईल.

या प्रदेशात सैन्य तैनात करणार का? या प्रश्नावर बोलतना ते म्हणाले की, ‘गरज पडली तर आम्ही सैन्य देखील तैनात करू. आम्ही या प्रदेशाची जबाबदारी घेऊ, त्याचा विकास करू, हजारो रोजगार निर्माण करू आणि हे संपूर्ण मध्य पूर्वसाठी अभिमानास्पद ठरेल.

दरम्यान, यावेळी इस्रायलचे पंतप्रधान बेंजामिन नेतन्याहू यांनी देखील यावर प्रतिक्रिया दिली. नेतन्याहू म्हणाले की, ‘ट्रम्प यांचा हा विचार इतिहास बदलू शकतो. ते गाझासाठी एक वेगळ्या भविष्याचा विचार करतात.’ तसेच, यावेळी बोलताना ट्रम्प यांनी लवकरच इस्त्रायल, गाझा, सौदी अरेबिया आणि मध्य पूर्वेचा दौरा करणार असल्याचीही माहिती दिली.